立法會前晚燈火通明，深宵就當奴曾、詩姐姐同埋林D9嘅香港政制發展第二號報告，同埋老董交畀人大嘅報告進行緊急辯論，不過，無論班議員點肉緊，香港人點急，喬曉陽方面都懶理，佢哋只係鍾意聽啲人大政協同埋自己友講嘢。
好似當奴份報告就最啱key，𠵱家當奴簡直係中央嘅知音人，唔怪得同佢一樣係虔誠天主教徒嘅李柱銘都頂佢唔順，前晚喺議事堂內大鬧當奴三人組甘心情願當奴才，中央同阿董唔想做醜人，佢哋就自動獻身，喺份第二號報告列出九個多此一舉嘅關卡，九個出賣港人嘅奸計，佢重叫當奴個組不如改名，叫做「政制窒息專責小組」。
嘩！八方都好少見媽田咁㷫，華叔都只係形容嗰九個嘢係九座大山，港人要有愚公四倍半嘅決心去移走佢啫，而卿姐亦只係叫佢哋執包袱收檔，唔好再尸位素餐。
當奴都唔示弱，臨尾反咬媽田同卿姐，話佢哋拋棄咗「一國兩制」嘅一國，將高度自治變成絕對自治，激化市民反政府同反中央嘅情緒，危害中央與市民達成共識。當奴惡起上嚟，都開始有啲土共味，向同宗曾憲梓靠近。言論如此激，睇怕都唔需要向天主懺悔咯。
當奴三人組肯定係老董九座大山嘅始作俑者，老董只不過係「文抄公」照抄可也，「七個必須五個不能」全部都係當奴原話，不過，「政改必須聽取中央意見、不能影響中央對特首嘅實質任命權」等話竟然出自飲香港水、流香港血嘅人之手，就可怕啲啫。
有人講笑話，老董今次一反常態，快刀斬亂麻，其實把「快刀」係由當奴交
經過前晚一役，媽田同當奴睇怕再冇friend做，係人都知，當奴最緊要保住自己頂烏紗同間府邸，老細高興，又有得同中央交心兼交差，幾正。
今日老董喺海南島參加博鰲亞洲論壇年會，見到胡錦濤都有得交代啦，話唔定胡主席會讚吓佢㖭。
另外，華叔、媽田同羅致光三個，日前同其他民主派議員為闖關五人組送行，但三人係咁易坐吓火車，未到羅湖已經鬆人，唔通驚一踏上羅湖橋即刻俾人拉？
佢哋解畫話係另有苦衷，因為前日朝早立法會有會開，若果民主派只顧闖關令會議流會，難免成為其他人批評藉口，所以佢三位去到半路中途就打道回程。
民主派中人話，若然早知中方會對「香港民意代表團」見一個捉一個，媽田同華叔肯定會堅持操過羅湖橋，就算俾公安人員捉咗，都一定會抗爭到底。
傳真︰2623-9278
電郵︰