潮流興上網，無線上網發展速度亦相當驚人，差不多已成Notebook新標準，家居桌面電腦貪冇駁線麻煩，Notebook用家更係鍾意周街上網。不過根據最新一期《選擇》月刊（330號）報道，無線上網原來隱藏種種危機，由資料竊取到駭客入侵都有機會發生，今日就同大家剖析種種危險情形，更搵嚟專家教你預防破解之法。
文：高旭 攝影：林栢鈞 ImageGirl：Silvia（P8）
唔係講笑，人人都可以做駭客，雖然有時唔係有心，但一點保安設定都冇，就好似冇關屋企門咁，任由他人自由出入。你鄰居可以隨時變身做駭客，通過無線網絡進入你的網絡世界，簡直係同你一齊分享上網嘅樂趣。唔講大家唔知，一般無線網絡接收器有效範圍可以達到550米（完全無阻擋計），以香港樓宇一般3米一層計，幾乎全座大廈嘅人都可以同你一齊上網。
另一個真實個案，就係試過有人喺車內使用手提電腦，電腦突然出現可以上網的標誌，好奇下，竟然發現原來唔使任何設定，都可以輕易使用他人網絡上網，估計該網絡訊號係由附近住宅發出，由於訊號強勁，因此道路上亦可接收到。當一個普通電腦用家都可以咁輕鬆使用他人網絡，咁樣駭客要竊取資料絕對係輕而易舉。
好多家庭用戶都因為喺屋企嘅關係，所以冇設定密碼嘅習慣，咁亦都係話：任何人都可以進入你嘅主機，但就算有設定，駭客仍然可利用假IP，假MacAddress去騙主機，呢類程式在網絡上有過千個可以任人下載，真係學生哥都可做駭客！
其實駭客除咗利用你的網絡外，更可以利用你嘅電腦去攻擊他人，來一招「借刀殺人」。另外駭客亦可以利用鍵盤記錄程式，絕對準確地一字不漏咁記錄你嘅信用卡資料同密碼，盡情消費！
現時香港有好多大型商場為大家提供免費無線網絡熱點（HotSpots），呢類服務睇落好似好方便咁，但一般的商場都冇使用WEP加密技術，大家試想，當閣下在商場使用手提電腦，享受免費無線上網樂趣嘅同時，其他人亦同時免費分享你嘅Email、ICQ或甚至私人相片，嚴重侵犯個人私隱，誇張啲講可算係一個「糖衣陷阱」。
睇完以上三大危機，係咪估唔到目前香港嘅無線上網咁唔穩陣呢？其實又唔使太擔心，因為只需簡單幾招，就可作出有效防範，今日就搵嚟專業資訊保安協會嘅楊和生先生，話畀大家知點樣先可以有效地保護資訊，防止他人入侵自己嘅無線網絡：
唔好將無線網絡發射器放得太近門窗。因為無線網絡覆蓋範圍高達550米，強大的大氣電波方便了各路駭客作入侵攻擊。
在家中，開啟網絡實體位址（MacAddress）過濾，只給授權的無線網絡卡建立連接，杜絕外來入侵機會。
64位元的5個位密碼實在太少了，相反128位元的13個位密碼就可以大大增加了入侵者的難度。因此開啟WEP加密時，使用128位元的WEP鑰匙會比使用64位元鑰匙為好，楊先生亦提醒大家記得定期更改密碼。
如不需使用無線網絡時請關閉電源，反正毋須上網，無謂增加畀人入侵嘅機會。
