大代理行財力雄厚兼人多勢眾，發展商好多時會將樓盤交畀佢哋做代理，或只畀一間做獨家，細行就得個恨字。不過，凡事都有例外，荃灣地膽代理晉誠地產，啱啱攞到永泰亞洲小欖漣山特約代理權。
晉誠地產營業經理張秋話，代理權由噚日起，為期三個月。其實佢哋喺農曆年前，已經交咗建議書畀發展商，加上早前又代理華懋青山公路翠景花園貨尾，有往迹可尋，所以今次至攞到特約代理權，可見努力係有回報嘅。
佢哋話，會喺派發嘅單張中，印埋呢樣嘢落去，話畀啲客知。
今次特約代理嘅單位有十一個，分層九九四至一二一七方呎，入場費二百六十幾萬；複式就一八○四方呎，最平六百七十萬。
美聯喺西半山羅便臣道開新分行，主席黃建業話，呢間舖係集團全港最大嘅地舖分行，面積四千方呎，有層地牢，前身係百佳超市。
咁大間舖，設備當然有番咁上下，淨係洗手間就有三個咁多，包括一個畀小朋友專用。
另有資料室，專門放全港新盤樓書及研究報告，可以外借畀客人睇。
最誇張莫過於佔地二千方呎，可以同時容納超過二百人嘅地牢，面積比寫字樓總部重要大。
黃建業話，今年內會喺尖沙嘴港景峰，及元朗錦綉花園，開九龍同新界區旗艦店，寫字樓同工貿又各開一間旗艦地舖，總投資一千萬。
自由行成為零售市道生力軍，大小商場競相爭取呢批內地客，一窩蜂搞自由行旅行團，招待內地客去商場購物消費。
趁五一黃金周即將來臨，信和集團四個商場，大搞連串懷舊主題節目，慶祝母親節，兼推動消費。活動下月一日展開。
尖沙嘴中港城播放懷舊電影，上演《十兄弟》與《頭獎馬票》等。大角嘴奧海城以平民夜總會做主題，安排七十年代榕樹頭街頭節目。小西灣藍灣半島有懷舊金曲欣賞。
屯門市廣場請嚟張學友與陳寶珠開簽名會。為凸顯懷舊氣氛，噚日搵嚟港寶飛機欖基伯助陣。
香港人好多都相信風水命理，世紀21因此請嚟堪輿學家方海閱，從風水角度，講解樓市走勢，又解答代理風水問題，反應踴躍。
聽講，其中一個詢問，係代理有日與買家睇樓，無意中拉開窗簾，突然見到窗角位掛咗幾度符，買家梗係大感不妙啦。
方海閱話，解決方法，係用元寶叠住溪錢及符，一邊燒一邊向五個方位拜，咁就冇問題嘞。咁叫做「謝符」喎，可以消除買家嘅不安。
代理梗係嗱嗱聲去做啦，個單位最後成唔成就重未知。
長沙灣宇晴軒二期，軟銷攻勢頻密，噚日有輯新廣告出街。
呢個長實樓盤，大賣歐洲主題，廣告片一開始，就係從高空俯瞰法國名勝凱旋門。
男女主角假設處身宇晴軒單位入面，遠眺香港夜景之餘，竟然隱約見到巴黎鐵塔，認真蒙太奇。
長實郭子威話，今次嘅廣告費用要成千萬。
佢重話，如果有其他樓盤做宣傳，想要呢條片，佢哋樂意借出。
蘭西
電郵地址：
