人大釋法咁耐，李家祥一直冇出聲，原來佢歎世界優先過愛國，放咗三個星期假，去咗埃及同蘇格蘭，周二晚先至返港，由於冇準備，所以佢既無去深圳見喬曉陽，亦首次冇寫好稿就企起身講預算案。
李家祥決定不再選，所以心情輕鬆，愛國釋法，睬佢都儍，佢噚日話今次埃及之行，聽到五千年前法老王點產生都好有趣，就係要喺鬥獸場同隻牛跑一個圈，跑贏隻牛先先有得做，有人笑叫唐唐圍住立法會走，俾六十隻牛追吓，睇吓佢有冇機會做下屆特首。
李家祥喺蘇格蘭揸咗六日車，載住太太以及個女，跑足一千八百英里，睇過好多堡壘同湖泊，但係見唔到尼斯湖怪。
另外，立法會噚晚終於可以就政改報告辯論，范太最後批咗，不過八方聽聞李柱銘早上去見過范太，講咗乜媽田唔肯講，佢只係話冇同記者講想向范太講粗話，唔知記者點知。又難怪佢嬲，因為係人都知單嘢有迫切重要性，不過，馮檢基封動議辯論申請信寫得比較差，又係真嘅。
傳真︰2623-9278
電郵︰