大市跌第7日，估計距底不遠，隨時有反彈機會。個市冇理由成日側埋一邊，淨係超賣兩個字，已經有條件彈番三二百點。
油價估計會喺下一個浪中，造番好啲，搵啲石油Call輪玩吓，應該有錢賺，不過佢哋成交普遍唔多，細注無妨，大注難轉身。
中石油Call輪揀9901同9343，前者8月到期，輪價86仙，溢價0.4%，槓桿率4.1倍，後者年底到期，輪價50仙，溢價4.4%，槓桿率7.1倍。中石油Call輪有好幾隻數據非常唔掂，屬高危貨色，例如9405，昨日正股（857）雖然爬高1格，隻輪都大散25%，點解？隻輪剩番唔夠兩個月命仔，冇錯63倍槓桿率勁爆，不過溢價10.8%唔多實際，除非正股升得好急，否則輸溢價輸到暈，輪價5.6仙雖然細件，提防細件之後再細件，啲一兩仙嘅窩輪，未跌之前一樣經歷過一兩毫嘅階段。又例如隻9758，11月到期，輪價4.9仙，槓桿率72倍又係勁爆嗰隻，不過溢價49%，你買埋我份。
中海油Call輪揀9032，輪價18.1仙，剩番個半月命仔，溢價1.2%，槓桿率8.6倍，幾乎平水，跟正股會跟得好貼。中石化Call輪揀9909，7月初到期，輪價55仙，負溢價1.7%，槓桿率4.9倍。
章盛