民主派五君子闖關，中方接待馮檢基、麥國風、黃成智等三人，涂謹申及何秀蘭未過華界就退貨，不過回鄉證得保不失，講到明係今日上嚟做騷唔入得，日後再上嚟，玩冰火揼骨，或者光顧牛郎K店，國家都重係無任歡迎，證明中方玩嘢拆招，段數真係高咗。黃麥基等三人，喺深圳由一名叫李飛嘅中國籍男子接頭，任憑三人大吵大鬧，重有茶點招待，毋須畀錢㖭。
涂謹申何秀蘭打回頭，涂謹申衰邊科？就梗係因為上次同媽田拍住上，去到華府，榮獲國務卿鮑威爾接待，盡顯「中國人的光輝」，而阿何秀蘭，就同大姐卿金蘭姊妹，楊森同劉慧卿亦陪同過羅湖，俾人「的」咗入房後，跟住再無罪釋放。國家一手軟，一手硬，道門冇閂到實一實，咁即是話為下次闖關，留下空間，胡溫新班子以民為本，係唔同啲嘅。
最新失業率公布，百分之七點二，經濟衰退，都重未有起色，倒不如國家真係放晒合資格嘅一億五千萬人來港，叫佢哋喺彌敦道一人吐一篤口水，然後按照清潔條例，位位罰款一千五百，加加埋就有現金二千二百幾億，全部撥歸庫房，就更加直接。
維港匯個審計報告出咗，矛頭直指殖民地餘孽盧維思，有啲親中人士，好想佢辭職。不過阿盧娶咗中國老婆，用行動表示愛國，跟住放棄英國護照，轉攞中國籍，呢一項創舉，證明中國嘅綜合國力真係好強，就算經佢手散足一億，八方都認為其實係好抵。唔怪得盧維思好似睇穿咗特區政府呢張底牌，印印腳繼續歎雪茄。
維港匯一炮一億，放一個煙花，咁就冇咗，猶如俾人兜面摑咗一巴，痛一陣，就冇事。不過審計署報告爆咗另一樣，特區政府為所謂科研發展提供資助嘅基金，投資嚴重虧損近二億五千萬，相當於兩個半維港匯。原來呢個基金，投資咗五十個項目，其中十八項嚴重虧損，lam咗政府一浸膏油，。
「適當時機」係幾時？既然係咁，維港匯嗰一億，都係長遠投資，同埋紅灣半島嗰批空置居屋，擺喺度，又何嘗唔係長遠投資，因為到咗二○三六年，本港人口一千萬，到時點都唔夠屋住，又何須現在再拆晒另建豪宅？一間公司上市，都要定期向股東交代業績，特區政府無數基金，都屬於俾人哄埋嚟蝕底咗，對方淫笑一聲走咗去嗰一隻。所以今次馮檢基等三人闖關成功，會見李飛榮獲茶點招待，唔使佢哋畀錢埋單，國家呢筆投資，幾件蛋撻加三杯奶茶，第日適當時機一定收得番嘅。
傳真︰2623-9278
電郵︰