梅艷芳舊年病逝，佢嘅骨灰一直安放喺梅媽跑馬地嘅寓所，梅媽有見志蓮淨苑嘅靈位咁耐都未有着落，所以梅媽同梅啟明兩母子噚日就同埋堪輿大師蔡伯勵去咗大嶼山嘅寶蓮寺幫阿梅睇靈位同揀日子。
梅媽同梅啟明噚日一早去到寶蓮寺，梅啟明喺電話度話：「志蓮淨苑話留位畀阿梅，一直都冇聲氣，冇理由走去𦧲人，𠵱家阿媽個朋友幫手搵到寶蓮寺，咪重架勢，起碼香火都鼎盛啲，阿梅喺呢啲環境都會安樂啲。」問梅啟明諗住幾時將阿梅嘅骨灰搬過去，佢又話：「呢啲嘢唔急得，要揀啱日子先可以『請』阿梅過去。」梅啟明更考慮將梅愛芳嘅骨灰都放埋喺寶蓮寺度，等佢兩姊妹有伴。
問到靈位嘅費用問題，梅啟明就話：「呢啲唔係講錢，係講交情嘅，阿媽個朋友同寶蓮寺裏邊人相熟。」又問到梅啟明係咪近日專注搞阿梅個靈位，唔追遺產住？佢幽默咁講：「呢啲嘢兵分兩路，追遺產嘅嘢冇得停。」
安雅噚日喺台灣買書時，企喺暢銷排行榜前睇書，因為佢好關心自己本新書《4999的印記》嘅銷售情況，當發現自己嘅新書打入暢銷榜嘅第十名時，即好開心咁話：「總算有多一些朋友願意買書多了解我。」
應采兒早前去LV個派對時同黃偉文撞衫，佢笑住話唔會覺得尷尬，重話反而覺得有趣。有報道話有唔少女星出席LV活動時乘機搵老闆，應采兒就話：「我有老闆喺度呀，咪就係我阿媽同我阿婆囉，咁有時見到啲老闆都會打吓招呼，其他嘢我就唔知嘞。」
上個禮拜六港姐第一輪面試，其中一個參賽者因為貌似印籍女士，所以本報記者叫佢做印度西施，前日佢打電話嚟，自稱叫Sanaa，強調自己唔係印度人，佢媽咪係墨西哥人，爸爸係倫敦人，要求澄清。其實幫佢澄清番件事當然唔係問題，乜做印度人好差咩？
吳浩康（Deep）日前被撒瑪利亞防止自殺會委任為「生命教育大使」，所以佢遲啲會同李鵬飛一齊主持一個名為「珍惜生命小種籽領養行動」嘅活動。另外「香港傷殘青年協會」話阿Deep嘅形象夠健康，亦都委任佢做「關懷大使」。阿Deep都話好榮幸能夠擔任到大使，佢重笑言皆因近日做得善事多，連面色都好咗㖭。
曾經同張藝謀三度合作嘅內地著名男演員李保田，佢主演嘅劇集《神醫喜來樂》喺內地大受歡迎，而有線娛樂台就會喺下周二起播放。由於李保田喺劇中飾演神醫一角深入民心，所以連佢去睇醫生嗰時都被人懷疑點解佢自己唔能夠醫治，令佢感到啼笑皆非。
