噚日倒塔時分，十幾位民主派議員就浩浩蕩蕩殺去深圳挑釁中國，不過一過羅湖橋，除馮檢基、黃成智、麥國風三個，其餘人好快就俾大陸公安捉咗入房，難怪有幾位坐坐吓，就內急起嚟要去廁所。
幸而公安哥哥喺呢方面都幾人道，畀幾位議員用公安人員辦公室嘅洗手間，雖然裏面冇廁紙，劉慧卿、單仲偕同李華明先後幫襯呢個洗手間。
尷尬嘅係，李華明同單仲偕去廁所時，唔知係咪佢哋個樣蠱蠱惑惑，公安人員竟然唔畀佢哋閂實廁所門，只容許虛掩。
有民主派議員笑指，咁難得入到羅湖橋另一邊，梗係要賴低啲生理「紀念品」；以表示對祖國嘅感情，李卓人亦話，今日比起佢十二年前接試圖闖關嘅韓東方返港時，自己行前咗二十米，不過如果香港民主係咁「循序漸進」法，真係喊得一句句。
幾位議員過唔到關，但身為全國政協委員嘅阿姐汪明荃，前日就好歎咁同百幾位港區全國人大代表、政協委員等操上深圳同人大常委會副秘書長喬曉陽會面。阿姐話，雖然各有各講，但大部份人都唔贊成○七及○八年普選特首同立法會。阿姐強調：「巿民對政治唔熟悉，進行普選時未必令大家好關心，若對政治唔認識又唔成熟時，我都唔贊成普選。」
（圖）汪明荃（左三）前日同百幾位港區全國人大、政協等操上深圳同人大常委會副秘書長喬曉陽會面。
傳真︰2623-9278
電郵︰