水貨大亨袁仁祥去完東京返嚟經常講：「香港人係掂嘅！」原來佢碰巧復活節高峯檔期過東京走貨，加上「港人四一免簽證」熱潮，東京從未如此熱鬧過，港人熱點原宿，聽講已變成小香港，相信進化成唐人街日子不遠。袁仁祥呼出水貨煙圈，手舞足蹈表示：「以為四一後會多咗水貨新丁，點知並冇預期中咁多，相反遊客就多咗好多成，實際數字我就唔方便講（其實唔知），不過由機場出到巿區，全程都會撞到香港人，好多都非常醒目，早就預備日本手機一部，在車廂內不斷暢談廣東話；不過日本坐公車唔畀講手提電話，有時喺車廂內傳嚟一把雄渾嘅香港人聲音，真係倍感親切。住方面，因為多咗批香港同胞，歌舞伎町嘅港人熱住酒店經常爆晒棚，我哋成班人住開嘅KENT、Vintage如果唔熟都留唔到房，復活節期間我哋個行家「黑鬼蕃」咪冇房住囉，差啲要去LoveHotel過夜，後尾我出面幫佢搵到酒店。有啲人面唔夠嘅水貨仔，就要被迫去卡拉OK，或打波子機，甚至去通宵麥當勞瞓，實在辛苦。今次總算港人衝出香港，證明香港人係掂嘅！」
主持人：大食Jack 八卦熱報：