去酒店食午餐聽演講，地鐵車廂中碰到寫手S，佢最近頻頻參與一啲非民主派活動，反對普選，對一人一票選舉嘅立場，與左丁山唔同。不過香港社會好細，中環來來去去都係呢班人，係一個小村落，有乜好鬧交，所以寫手S與左丁山碰頭時，仍然有嘢講。
寫手S話佢參加好多活動之後，覺得中央出錢出力，直情係做咗冤大頭，因為香港嘅「反民主派」，大部份係劉阿斗，激到阿爺彈起，呢班人支持特首不力，批鬥民主派唔夠水平，參加直選又只得一個曾鈺成似樣，你話阿爺有乜辦法唔直接上陣，以免民主派全面得勢吖。
聽完寫手S咁講，醒起前晚食私房菜之時，席上有真正愛國專欄作家，力主香港學習新加坡，禁止反政府遊行，學生上街就拉得就拉，大樹特樹政府權威。大家聽咗，大笑一番，林超人以為講緊「頭條新聞」，笑得最大聲。笑完之後，大家問佢：「愛國派有乜人可以企出嚟呀？」愛國作家諗咗一陣，嚡一聲：「都幾難，民主派有個余若薇，微笑殺死人；劉千石，言簡意賅；司徒華，斬釘截鐵……」競選講形象，連愛國作家都喺呢方面認認哋輸，確係冇法子。
五十年來，香港啲叻仔精英，考入港大、中大或者留學外國嘅，的確冇人加入左派陣營，有之亦寥寥可數，而且唔係最叻嗰批，唔怪得曾蔭權小組報告話香港須要培養政治人才，因為當今支持特區政府嘅人士之中，除咗大富豪之外，事實上係冇乜人才，反而五六十年代，左派之人陣容甚盛，全部係自北方南下嘅。