唔知係邊個定落嘅規矩，日本水着女星無論喺寫真集入面點豪放都好，拍廣告出唱片嗰陣都包到實一實，好似擁有性感嘴唇嘅井上和香，就包住綿胎扮綿羊，拍咗個木材廣告。
睇井上一味搔首弄姿，就知佢想sellcutie形象，講真我羅拉係女人，惹火身材唔係我鍾意一個女星嘅原因，但井上着咗件綿羊衫，真係乜嘢星味同女人味都冇晒，廣告公司度條咁嘅橋係咪太嘥料呢？
受人二分四嘅井上即刻幫廣告商解話，佢話：「呢隻木材係新西蘭出產吖嘛，咁講到新西蘭，就梗係綿羊最有名啦！我一見到套綿羊衫，真係好鍾意，即刻想拍㖭呀！我覺得着上身就好似玩緊cosplay，所以專登留番少少前額頭髮出嚟，如果唔係就太似羊嘞！」睇嚟井上為咗呢個look下過唔少心機喎！
話說回頭，只有井上呢啲重未上位嘅水着女星，先肯醜化自己拍廣告，我羅拉聽講佢哋嘅廣告身價唔使一百萬港紙，喺日本算好抵用喇！