新特蘭前晚喺英甲聯作客輸畀水晶宮○比三後，令闊別英超聯九年嘅諾域治，終於可以喺下屆再與曼聯同阿仙奴等強隊比賽。
諾域治喺降班之前都威過，除咗喺首屆（九二至九三球季）英超聯攞季軍外，重試過喺九三至九四球季嘅歐協盃，淘汰拜仁慕尼黑入第三圈；可惜佢哋喺賣走霍斯同瑟頓等主力後，演出就開始下滑，重喺九五年夏天降班。
𠵱家佢哋班波當然冇可能同十年比，但陣中亦不乏好手，好似係英格蘭國腳龍門格連、前瑞典國腳前鋒史雲遜同埋前列斯同曼城前鋒赫格比咁，所以我求大俠亦睇好佢哋，唔使做英超聯升降機，喺英超聯唔係淨係玩一季。
話時話，諾域治嘅大老細係飲食業巨子戴莉雅史密夫，咁即係話同伯明翰一樣由女人揸弗；唔怪得啲人成日話，足球，女人一樣啱玩啦！
響首戰俾積臣哥連斯「𡁻低」嘅紐約人前鋒添湯馬士，噚日就出嚟話隊友唔爭氣；佢話自己俾人整低之後，諗住班隊友會「做嘢」，點知個個都當睇戲咁就算。佢重寸網隊嘅馬田，因為有隊友撐先扮晒好打；揚言要搵唐京幫佢兩個搞場拳賽，等人睇吓馬田有冇膽隻揪。
原本喺電視台講波嘅前曼聯領隊艾堅遜，認為車仔後衞迪西里要為喺歐冠盃四強首回合，輸畀摩納哥一比三負責，直播用帶種族歧視字眼嘅粗口鬧迪西里，結果冇咗份工㖭。艾堅遜事後亦有道歉，但每個人要為自己做過同埋講過嘅嘢負責，艾堅遜真係咎由自取。
飛燕諾下季會穿新球衣比賽，但反應麻麻，重有球迷要求改款；點解？之唔係件波衫太窄身，啲球迷認為着上身後，會現晒佢哋個啤酒肚出。球會推出新波衫，目的唔係等啲球員有新衫着，而係想賺錢；𠵱家班米飯班主唔滿意，如果我求大俠係飛燕諾高層，就一定要波衫製造商改款。
𠵱家打緊世桌賽嘅英格蘭球手奧蘇利雲，喺打失一個好易打嘅波後，對住個袋口整粗口手勢。事後賽會表示考慮罰奧蘇利雲錢，但奧蘇利雲竟然好寸咁話：「反正我大把錢，罰幾多即管講。」呢單嘢擺明奧蘇利雲唔啱，而佢一啲悔意都冇，小心第日俾啲球迷離棄。