「母親節，我會同啲仔孫一齊食飯，個仔送畀我嘅禮物我都好鍾意，因為個新抱好叻，成日都知我鍾意乜嘢，最開心係收到六個孫仔孫女送畀我、親手畫嘅卡；我嘅母親節節目好簡單咋。」真係好簡單，不過唔簡單嘅係，呢位母親個仔係財爺唐英年。
唐媽媽唐尤淑圻噚日接受新城電台有關母親節嘅錄音訪問，佢事後話之前將親手訓練嘅老工人送咗畀財爺，等佢日日有湯飲，自己就再訓練另一個；咁唐媽媽嘅廚藝應該好高超？八方衝口而出咁問咗一句，換嚟嘅係唐媽媽一個凌厲嘅關目。
八方問：「母親節嗰日會唔會煮番啲拿手小菜畀啲仔孫食呀？」主持人羅霖即時話：「嘩，母親節你都要阿媽煮？」唐媽媽就話：「梗係唔係我煮啦，（重要阿媽煮）畀阿媽鬧呀你！」
Sorry呀，八方唔敢唔敢，重要祝全世界嘅母親都好似唐媽媽咁幸福。唐媽媽訪問會喺五月七日新城娛樂台中午十二點播出。
（圖）唐媽媽（左）同羅霖（右）兩位靚媽媽都話母親節係唔應該叫阿媽煮飯嘅。
凌樹輝攝
傳真︰2623-9278
電郵︰