立會一連兩日辯論唐英年份處男預算案，由於唐唐個勢上緊，聽講有中央撐，今年又冇乜加稅大動作，議員都冇乜好鬧，但左一句腳頭好，右一句行好運，唐唐聽入耳相信別有滋味。佢老友田北俊同李國寶等一班有錢佬就以紅酒稅做文章，異口同聲話以為唐唐會減酒稅，點知令人大失所望，寶哥哥話香港酒稅咁高，難以吸引遊客，香港做唔成旅遊勝地，亦會「少好多就業機會」。
田少則指一支原本幾百蚊嘅下價酒，打埋稅喺香港要賣過千蚊，本來抵飲都變成唔抵，佢重話有酒客唔捨得畀咁重稅，就以螞蟻搬運方式逐支酒帶返嚟，最終庫房得不償失。
闊佬關心酒稅，草根議員則多談政府開支，前綫何秀蘭指唔少有錢佬擔心一旦普選，就會令香港走上福利主義不歸路，佢叫一眾闊佬放心，話就算李卓人、梁耀忠等工會領袖真係有得出來選特首，佢都唔會投梁耀忠一票，何況兩人根本冇機會。
傳真︰2623-9278
電郵︰