唔知係唔係科技發達咗，所以連啲人都大膽咗，有啲女星俾人話佢隆過胸，一係就大方承認，一係索性搵個醫生上電視做檢查以示貨真價實，唔通真係假嘢都做得咁真。不過，東方人始終都係冇咁開放同大膽，啲女優即使真係去整，都只敢靜靜行事。最近網上被傳隆過胸傳得最勁嘅，睇怕要數怕醜小野貓仲根霞。
我羅拉即刻攞返霞妹十七歲初出道嘅相嚟睇，當時頭髮短短嘅佢，除咗含羞答答嘅表情，同𠵱家比冇乜變之外，胸部線條嘅起伏，同佢𠵱家二十二歲嘅驕人身段比，真係差幾個碼位，唔通過咗十七歲之後，都重可以第二度發育？
不過霞妹就一於好少理，以免愈描愈黑。早兩日佢同事務所一班同事慶祝生日，都唔知幾開心。重親自餵在場每個人食蛋糕。講到生日願望，霞妹話：「以前人人都當我係細路女，好縱我。二十二歲啦，我唔可以再唔成熟啲。𠵱家我為咗將來學緊烹飪，下年我要親自搞個homeparty！」
學定煮餸做家庭主婦，證明霞妹係個好傳統嘅女仔，不過，我羅拉覺得，霞妹不妨學小池榮子上電視接受驗胸，當係宣傳嘅一種都唔錯啫！