格老似乎暗示可能加快加息，港股勁跌167點或1.35%，收報12227。國企指數跌得重甘，跌幅達4.3%，收報4258。
國企指數7日累計大跌15.5%，但阿虎擔心國企跌浪重未完結，唔少大行預料連4000關都會失守，大摩則叫人盡沽中國概念股，荷銀更話要跌至2800水平。與94年比較，當時市場對六四事件猶有餘悸，基金恐防宏觀調控演變成政治風波，因而拋售中資股套現離場，中資股曾被芬佬冷落一段頗長時間。
其實今時唔同往日，今次宏調乃正常經濟周期調整，應在芬佬預計之內，即使美國可能加息，其實是由經濟好轉所帶動，對中國應屬利好消息，何解國企仍大幅下挫呢？據Cookie所講，近期國企遭拋售，其實是對沖基金作怪，早前對沖基金以低息拆入大量美元來港炒股，特別是新上市的國企。如今有迹象息口提早上調，美元回升，對沖基金炒股成本勢將上升，所以趁高食胡離場，又可以賺埋滙水。大家要特別小心中國人壽（2628）、人保財險（2328）及紫金（2899）等股份，博反彈者，提防低處未算低。
不過，標普就真係令阿虎欽敬，在國企風聲鶴唳之際，竟建議買入安徽海螺（914），目標價定於15.90元。黑客話，據講繼中行後，農行及工行亦收緊過度投資行業的貸款審批，而安徽海螺從事的水泥行業是其中一項。有關行動主要針對競爭力弱及規模較小的企業，經過一輪宏調淘汰後，最終令安徽海螺這類大企業受惠。
阿虎