大市噚日又插多百幾點，國企繼續玩洗倉，如果再跌落去，好容易搞到股民意志消沉，好彩秋官套劇在今個星期六大結局，迷信嘅炒家仍存一絲希望。
目前咁嘅時勢，二三線股就算有消息都唔易玩。江湖傳聞想開車多時，但時機總係唔夾嘅金朝陽（878），噚日公布截至2003年12月全年業績，終於轉虧為盈，盈利有6180.6萬元，派末期息2仙兼5送1紅股。
講真一句，若果係先幾個月地產市道剛復甦之時，金朝陽相信會好似其他地產股咁炒咗上去。隻股2月份搞過一次批股，每股作價2.20元，傳聞接貨者都諗住有機會發圍。
不過，時機唔就真係冇辦法，隻股噚日雖然升4.2%，收2.50元，但成交相當奀豬，只得19.4萬大股，金額46.36萬銀。寄望大市回升之時，金朝陽被人重新留意。
另外，小初前兩日品題嘅冠捷科技（903），見報當日股價即跌，點知噚日又三扒兩撥升番5.5%，收5.75元，幾乎又見番全年高位。
慕容小初