早前舉行嘅美國紐約國際車展，Jeep除展出最新款嘅GrandCherokee型號，原來另一邊廂佢哋又展出咗最新款嘅Liberty，一樣咁搶鏡！
在場展出嘅JeepLiberty，擁有一個極具吸引力嘅造型，硬橋硬馬之餘又帶點圓潤嘅車身線條，襯以一對頗有神氣嘅頭燈組合，絕對能顯現出RV應有嗰份剛強味道；至於車廂方面，廠方改用新物料鑲嵌Seat位，加埋原來闊落車廂空間，四驅車都一樣會坐得好舒服。
新車以一台全新2.8公升柴油引擎作動力核心，馬力輸出約為160ps/3800rpm，而扭力則為40.8kgm/1800rpm，雖然馬力及扭力輸出有所增強，但其耗油及廢氣排放量，都比一般柴油引擎來得更低，以求達致好力、慳油及環保嘅特點。
記者：鄭達基