喬曉陽落深圳開檔，徵詢「港人意見」，本來指定見港區人大及政協。點知立法會內人大政協幾隻大馬騮，如范太、田少同葉國謙竟然抗命，拒絕北上，寧願留低喺中環立法會，討論唐唐個財政預算案。阿爺嗌上去交功課都唔聽，咁又真係幾「高度自治」！
又係嘅。唐唐係下任特首超級大熱門，財政預算案立法會辯論，邊個唔畀兩分面擦番兩嘢？邊個今日捧足場，下屆唐唐治港班子嘅三司十一焗就邊個有份。喬曉陽雖然都好惡，但始終唔係下屆特首，港區人大政協眉精眼企，留喺立法會親「英」，好過走上深圳參拜紅太陽，何況個個閃晒，自己人票數唔夠，唐唐若然受到民主派突襲鞭撻，邊個護駕？
所以又係得番曾憲梓、曾鈺成同劉漢銓等人上去爭咪嗌，喬曉陽唔知會唔會冇晒癮。不過寧願對住曾憲梓，都唔見民主派，搞到民主派嘅涂謹申、何秀蘭、馮檢基、麥國風、黃成智等五君子，組成「闖關敢死隊」，今日清晨，在紅磡車站光榮登車，民主派人士傾巢相送，好似荊軻刺秦王，風蕭易水寒一樣，充滿張藝謀式嘅史詩片悲情！
易水送荊軻，壯士一去不復還，但五君子敢死隊，好可能就即去即還，一過羅湖橋，即時響紅燈，四男一女，即時彈回，坐原班九廣列車，落返紅磡。
五人之中，最大損失估計係長期兩家茶禮通食嘅馮檢基。公然挑釁祖國，馮檢基張回鄉證凍過水。一收咗證，唔知幾時發還，涂謹申去過美國，晉見過國務卿鮑威爾，本身本簿經已花晒，彈返轉頭，佢重有賺，不過馮檢基就唔係咯。
國家聽取「港人意見」，搞到港人要闖關強行表達意見，都咪話唔搞笑。民主派玩闖關，證明香港民主成熟咗。
當年台獨人士許信良、彭明敏，流亡美國。一樣係飛回台北玩闖關。闖吓闖吓，就闖出名堂，今日許信良做咗反民進黨街頭英雄，彭明敏就做咗國建黨兼台獨教父，雖然菲律賓前總統科拉桑個老公，馬尼拉闖關，一落飛機就俾馬可斯派人兜頭開槍砰瓜，但以國家今日嘅國力，強過菲律賓咁多，連南沙羣島主權，聽講都未驚過賓佬，涂謹申等五壯士闖關，斷估都唔會打直去，跟住冇咗影，叫家屬返上去，繳付子彈費，然後同佢哋打橫抬返落嚟啩。
傳真︰2623-9278
電郵︰