中原地圖同地政署合作，加入人口普查資料，蘭西上網睇吓乜料，記起有朋友住火炭駿景園，所以搵呢個盤做試驗，竟然發現特別現象。
普查將十座分五組，有一組家庭月入特別低，比最高嗰組低四成！呢組月入中位數係五萬二，最高嗰組有八萬七。
另外，呢組較為富有嗰班，又係「窮」過人。以家庭月入上四分位數嚟睇，呢組只得七萬八，其他組就有十一萬三到十二萬四。
駿景園由一至十一座，冇第四座，上面講個「貧窮組」就係第二組，即三及五座。第日睇個業主喺邊座行出嚟，咪粗略估到佢嘅收入囉！之不過，住得起駿景園嘅，基本上都係非富則貴嘞。
蘭西又查過，三及五座嘅僱員同僱主比例，與行業分布，同其他組群大致差唔多；而平均住戶人數係三點三人，其他組群係三點五到四點三。至於職業分布，屬經理級及行政人員嘅，佔近三成七，係第二高嘅組群。不過唔知點解呢班經理咁少人工！
𠵱家樓市又返回賣家天下，買家出價要畀到業主滿意為止，唔係遲啲再傾，可能又要高啲至買到。
香港置業潘達恒話，啱啱有個換樓客，去將軍澳新都城睇樓，唔夠半個鐘，就話想買。初時業主唔接受佢嘅出價，佢好果斷，連追三口價。前後唔使半粒鐘，終以一百三十八萬購得心頭好。
個單位係五座中層B室，四八七方呎，以成交價計，每呎二八三四元。
中央政府送畀本港嘅大禮源源不絕，五一黃金周之前宣布，再開放多九個內地城市居民來港自由行，消息公布無耐，各大商場、零售店已經「紮馬」迎戰，九龍倉噚日重搞埋記者會公布詳情。
除咗反應快之外，推廣大員重好有創意，好似荷里活廣場咁，就整咗本好似《通勝》嘅書仔，介紹黃大仙同鑽石山旅遊景點，目的當然係吸引內地同胞去消費，所以書仔裏面有好多商舖優惠券。
問荷里活廣場推廣大員，點會諗到用《通勝》呢個構思，佢話，原來內地同胞雖然知道《通勝》係乜嘢，但喺內地唔係咁普遍，所以就諗到用《通勝》，做優惠推廣。
樓市近大半年呈現健康復甦情景，銀行同代理，開始將火力轉移到二手市場，其中恒生銀行搶佔先機，率先同中原地產合作，向二手客推介「九成按揭保險計劃」。
恒生抵押貸款主管鄧國亮講，樓市好咗，近排佢哋做多咗好多二手按揭。
佢哋計劃派出一百個熟悉做按揭嘅職員，落到去中原分行駐守，為二手客即時解答有關按揭問題。
而且，由即日起，經中原推介畀恒生，首二百名想承造九成按保嘅買家，更可以透過恒生信用卡還錢，又可攞到cashdollars現金獎賞㖭。
自由行客成為香港經濟救星，好多行業，就係咁得以起死回生。蘭西聽講，喺西環一帶，有啲人租咗幾層住宅，改裝成多個單位，出租畀啲自由行客住，收費每日一百蚊，聽講話，爆晒棚㖭。計落好快已經回本，兼有得賺。
由於同一區，有好幾個人經營呢類出租生意，所以，有時自己單位客滿，會將啲客轉介畀同業，實行互相幫助。
蘭西
電郵地址：
