歐洲矚目影壇盛事「第五十七屆康城影展」將於下月十二至二十三號舉行，噚日大會終於公布今年參展嘅電影名單，其中一早已講明希望趕及參展、王家衞執導嘅電影《2046》，一如所料成為參賽項目入圍電影，亦係唯一一部入圍嘅港產片，同其餘十七部電影競逐最高榮譽嘅金棕櫚獎。
據知王家衞已經拍完《2046》，梁朝偉、張曼玉同章子怡拍咗四年幾，終於可以鬆一口氣，套戲重會喺康城作全球首映，認真威水！而其他競賽電影包括張曼玉同法籍前夫奧利華阿薩耶斯（OlivierAssayas）合作嘅《Clean》、動畫電影《史力加2》同湯漢斯（TomHanks）主演嘅《師奶殺手》。
另外，雖然張藝謀執導嘅《十面埋伏》最終冇份入圍角逐金棕櫚獎，但係就被列為其中一部非競賽項目嘅參展電影。
荷李活動作影星尚格雲頓（JeanClaudeVanDamme）用咗八千五百萬港元，買入君臨天下高層相連單位。上個月佢嚟香港睇樓，諗住遲啲返內地拍戲，可以有個穩定嘅地方住，所以就揀咗喺香港做落腳地。
據中原地產助理營業董事許偉邦話，尚格雲頓買樓首要條件係高樓大廈，其次係交通方便，重有佢篤信風水，買樓都會問風水師意見。
梁詠琪（GiGi）雖然腳傷，但佢噚日仍到台灣宣傳，講到感情方面，GiGi話會有自己嘅立場，佢認為兩個人即使喺埋一齊，亦都唔好要改變對方，而係大家做番自己，馮仁昭覺得GiGi咁識諗，難怪伊健咁錫佢！
