忍唔住喇，忍唔住喇！近幾日陽光普照，實在令人忍唔住飛身享受大自然！不過，要做好事前事後準備先至好出門口，例如自製一支天然蚊怕水，於戶外就唔怕俾蚊咬到周身痕！返到屋企就敷番個面膜，曬完都可以靚番晒！
記者：李玉蘭
攝影：梁翠妍
ImageGirl：Avis（ImagineLtd.）
鳴謝：BeauteScents（34223280）
穿上小背心、涼快短褲固然爽，但亦最易惹來「狂蚊浪蟻」飛禽大咬！如果不想變成蚊蚊的大餐，出門就要帶番樽自製蚊怕水！材料只不過是幾滴香薰油和蒸餾水，勝在夠天然，而做法又簡單，是防止被蚊咬的好幫手。記得每次使用前先行搖勻，效果更佳。
材料：
香茅香薰油2滴、茶樹香薰油2滴、薰衣草香薰油1滴、蒸餾水1支
如果自己或同行親朋體質一般，可以做1條「急救頸鏈」。綁在鏈上的吊墜，查實是放有不同香薰油混合液的樽仔，聞一聞可紓緩身體不適，例如應付曬到暈陀陀，可選用薄荷、迷迭香及薰衣草3種香薰油。有需要時，只要聞一聞或滴在脈搏位便可。
材料：
行到虛脫：甘菊香薰油2滴、薰衣草香薰油1滴、天竺葵香薰油1滴
曬到暈陀陀：薄荷香薰油1滴、迷迭香香薰油1滴、薰衣草香薰油1滴
暈浪作嘔：薑香薰油2滴、薄荷香薰油1滴、薰衣草香薰油1滴
在又熱又缺水兼食咗熱氣嘢的情況下，小嘴最易變成一孖潤腸！如果你一早做好潤唇啫喱，就可以不時用佢滋潤吓！而用上蘆薈啫喱作材料，比一般潤唇膏更覺清涼。如買不到蘆薈啫喱，可用鮮蘆薈條磨成啫喱狀來取代。
材料：
蘆薈啫喱1盒、甘菊香薰油2滴、天竺葵香薰油2滴
做法
將甘菊及天竺葵香薰油加進小量的蘆薈啫喱中調勻，然後存放在盒內待用。
行完山塊面「𣲷黐黐」，返到屋企大可攤片水果面膜於面上，㷫烚烚立即消，又可美容！除了西瓜外，可將青瓜榨汁，浸透面膜紙後用來敷面，亦有同樣效果。
材料： 西瓜1磅、面膜紙1包
小秘技
不同品牌、產地的香薰油的售價及品質各有差別，宜選用大品牌和有機出品，質量會較有保證。而各種混合液宜即做即用，不宜儲存過夜。另外，若一次過混合了有不同效用的香薰油混合液，最好用筆或貼紙在樽外畫上不同記號或圖案以作識別。
