上次介紹過屯門虎峽谷徑，輕輕鬆鬆4小時收工，今次介紹另一路線，包你一樣睇到屯門全景兼奇石，視野重闊好多㖭，不過今次行嘅再唔係舒服郊遊徑，要徒步登山，崎嶇好多，事不宜遲，我哋即刻向九徑山進發。
記者：陳震霖 攝影：楊錦文
模特兒：Jason（StarAsia）
屯門何福堂書院落車，向杯渡路方向行，搵麥理浩徑第10段終點，我哋終點當起點行，入井頭村中村，呢條村四周有唔少溪澗，加上近來頻頻大雨，唔少澗口形成一個個迷你瀑布，好過癮。慢行5分鐘，見一條長長嘅黃色樓梯，上到頂見路口，左右兩路千祈唔好行錯，左接屯門徑，右接全長15公里嘅麥理浩徑第10段，記得右轉入麥理浩徑，直上九徑山。
接走一段引水道，發覺唔少人真真正正沿引水道而「行」，近睇，發覺佢哋用緊空樽裝山水，有啲重誇張到帶埋手推車，一次過運走十幾支山水，睇嚟打算拎番屋企沖山水靚茶。再行大約10分鐘，有隱蔽路口上九徑山，雖然無明確指示路標，但因為平時都有唔少人上山，基本上山路已開，路縱崎嶇但都唔算好難行。
上到九徑山山頂，偶遇一人，幾近身無寸縷，瞓喺大石上面曬太陽，真係要寫個服字！都係唔好理佢，影屯門全景要緊，山頂視野最廣闊，由屯門避風塘直到嶺南大學全部睇得晒，除咗自備攝影器材，大家最好帶定支行山杖，行山影相舒服好多。
其實唔使上到山頂，當大家上到差不多400米嘅時候，第一顆奇石就已經出現，先有「試劍石」，一嚿路邊巨石好似畀人從中劈開一半咁；再嚟係「簷篷石」，人匿埋喺石罅裏面，就好似徒手頂住嚿巨石咁，好盞鬼。
再行多1小時，會見到分別寫住「無常」同「無為」二字嘅兩嚿大石，四字來源無從稽考，可能係有心人想宣揚道家思想，勸人要睇開啲睇化啲，凡事要順應天意，唔好過份強求功名利祿，得閒就遊山玩水，行吓九徑山，人自然會開心啲。
睇完石依原路落山，出番青山公路，順道參觀善慶洞道堂。道堂古色古香，亭台樓閣，同隔籬現代化嘅市中心廣場成強烈對比，堂內供奉玉皇大帝、孔聖先師同觀音大士等等神祇，如無宗教信仰，亦可參觀一尊放置室外嘅孔子銅像，懷緬一下孔聖對後世嘅教悔。
尾程參觀歷史悠久嘅三聖廟，三聖廟於1914年落成，有90年歷史，由當時香港船塢業人士興建，選址興建時，偶然發現三聖墟附近有一石洞，洞內有尊銅麒麟像，而麒麟代表吉祥，所以新廟落成後，再將洞命名為「麒麟洞」。
三聖廟點解唔叫一聖、二聖，而要叫三聖？因為廟內尊奉儒、釋、道三教先師，即孔子、釋迦牟尼同老子。一入太歲殿，置喺大門正中間位置嗰位係斗姥元君，佢身坐蓮花，6隻手分別攞住唔同法器，身邊重有佢統領嘅60位太歲，位位獨當一面，威風凜凜，各持不同法寶。據廟祝講，市民要祈福拜太歲，首先必須向斗姥元君上香，然後就向當年太歲許願，最後才向本命太歲（自身出生年份太歲）祈福，求事事順景，如意吉祥咁話。
肚餓，近近哋去三聖廟對面嘅恆福花園醫肚，下午茶餐炒粉麵飯連餐飲$20，重要大大碟，胃口細啲隨時食唔晒。
恆福餐廳菜館（21468538）
地址：屯門三聖村恆福花園2樓210至212號舖
1.上九徑山：葵芳地鐵站乘67M巴士（$7.8），屯門青山公路─新墟段何福堂書院下車。
2.訪善慶洞：原路下山，折返何福堂書院，過杯渡路，沿青山公路—青山灣段方向行10分鐘直達。
3.訪三聖廟：善慶洞乘的士（約$15）直達三聖墟，回程時三聖廟出青山公路─青山灣段乘52X巴士（$9.5），返回美孚地鐵站。
全程：約6小時
