自由黨主席田北俊，上次「七七事變」激到中央好唔開心，今次有得去深圳見喬曉陽補飛捧國家場佢又唔生性，寧願留喺立法會議事堂捧前黨友唐唐場，支持預算案，之後又攞住最新嘅民調結果，話自己喺新界東嘅歡迎度僅次於有百分之十五支持嘅阿富。
排第二、有百分之十三點五支持，重高過卿姐二點五個百分點，拋離湯家驊六個百分點，田少梗係high啦。問田少係咪直選？佢依然話「唔知」，因為又釋法，又人大常委開會，唔知會否影響佢嘅得分。
不過，近日為民主派參選協調而費神嘅民主發展網絡主席朱耀明牧師，就最想田北俊呢類商界背景嘅人直選成功。佢話田少當選，對香港長遠民主發展有利，因為可以鼓勵商界直選，亦可壓住有啲大商家所謂「民主直選只會選出基層政黨代表」嘅言論，雖然朱牧希望田少贏出，不過佢話明唔會因此讓路，要攞個位田少就要使出真功夫嘞。
傳真︰2623-9278
電郵︰