米禾爾前晚喺英甲輸畀屈福特，𠵱家喺英甲排第七名，原則上重有機會爭入第三至六位打升班附加賽，但最慘就係佢哋喺下個月中要同曼聯爭英足總盃冠軍，分分鐘搞到兩頭唔到岸。
米禾爾喺本月初贏咗新特蘭入英足總盃決賽後，就衰到𠵱家，往後五場聯賽只係攞到三和兩負，故喺英甲嘅排名亦跌出前六而居第七。前晚佢哋喺主場輸畀屈福特後，𠵱家比第五位嘅韋根同第六位嘅韋斯咸，分別少三分同一分，但由於重有三場聯賽，數字上仍有機會打升班附加賽。
米禾爾重有機會升班，冇理由唔博，但問題係，如果最尾衰咗，唔單止班兵殘晒，兼且重會影響士氣，下個月二十二號點同曼聯爭英足總盃冠軍呀？並唔係我求大俠睇死佢哋，照情況睇，佢哋好大機會班又升唔到，盃又攞唔到。一句講晒，佢哋真係俾英足總盃累死。
曼聯後衞加利尼維利呢期都可謂行緊好運，繼上周中英超聯對李斯特城時一箭定江山，爆出個幾十倍嘅「首名入球」之後，前晚聯賽對查爾頓佢又有一球進帳。要知道加利仔喺對李斯特城入球前，已經兩年幾無喺聯賽入波，𠵱家就一個禮拜入兩球，難怪費格遜賽後都話估佢唔到！
意大利國家隊教練查柏東尼前日話前鋒選擇多，但佢會堅持等恩沙基同埋迪比亞路重拾狀態，而帕爾馬嘅基拿甸奴始終係屬於廿一歲以下代表隊喎；言則今屆歐洲國家盃都唔會預小朋友嘞。基拿甸奴一心以為今屆入咁多波有機會，聽完老查咁講，簡直係一盆冷水照頭淋。
愛爾蘭下個禮拜會作客同波蘭友賽，亦會係堅尼重返國家隊之後首次披甲。不過，領隊基爾公布大軍名單時講到明，話堅尼唔會擔任隊長，繼續由根寧咸戴上隊長臂章。我求大俠覺得咁做都啱，始終堅尼上次退隊事件後，同隊友關係有變，咁快做番隊長，關係重難修補。
今季蘇超聯冠軍塵埃落定，些路迪同格拉斯哥流浪經已為下季做準備，引入新血，但奇在兩隊想搵同一位前鋒，而且竟然係謝菲斯。呢位英格蘭前鋒今季就算借去愛華頓，都無乜上陣機會，早排重同領隊莫耶斯講手，所以傳些路迪搵佢頂拿臣確實意外，唔通想炮製另一個瑟頓？