平時食飯，出入會所之間，早已習以為常，好多會所以前食飯要訂位，但呢幾年，會所內空枱特多，午飯如是，晚飯更慘。有時都唔明，啲會員食客去晒邊？大酒店午飯時間，中西餐廳都唔客滿啫。
呢晚去會所吃晚飯，兩個人埋單，百幾銀，埋單時部長問：「左先生，啲樓市咁好，真唔真㗎？會唔會又係呃我哋呢？」左丁山話：「豪宅的確升到飛起噃，炒家特多，不過中下價樓就得益不太大，你要換樓就睇吓自己供唔供得起啦！」
部長講：「個個話經濟好番晒，我都睇唔到。呢個會嘅會員，個個都係搵到個錢，中產以上嘅人士，以前特首未做特首之時，都經常來此，亦曾經有唔少高官視本會為飯堂。但現在好多客唔見咗影噃，個個走晒去邊呢，經濟好番佢哋都唔返嚟嘅？」
經佢提醒，呢個會餐費叫做便宜（以會所計），食物質素好好，物有所值，兼且位置方便，的確冇理由只得一半至三分一嘅上座率噃，百思不得其解，唔通個個去晒銅鑼灣趁熱鬧？
據老友「陸軍裝」告知，曾經盛行一時嘅私房菜，已經變成慘淡經營，執咗唔少，只剩番兩三間好出名嘅仍然要排期。左丁山極少吃私房菜，呢晚跟陸軍裝去銅鑼灣參加私房菜聚會，感覺上直情係業餘經營，全無專業水平，收三百蚊一位，下次唔使預我，都係走番去會所，正正經經食一餐好過。