個市第5日下跌，淨係睇恒指，好似冇乜弊傢伙，恒指只係唔見55點，但睇國企指數，則弊到加零一，呢個指數再散3.9%。
10大升幅窩輪，7隻係中企Put輪，升幅由14.3%至46%。最多人買賣嘅中企Put輪9451，收24.1仙，雖未入榜，都升14.2%。上榜最多人買賣嘅則係9411，收12仙，升18.8%。
9451今年7月到期，溢價4.2%，槓桿率4.7倍。9411喺6月到期，溢價6.9%，槓桿率12.4倍。短期國企繼續激盪波動，9451同9411仍然會係睇淡國企炒家嘅主力對象。不過，高位搶貨風險唔細，倒不如若有機會，國企再跌多一跌嘅話，執啲中企Call輪，博技術反彈，但要揀對象都有啲難度。講數據，9363同9366最靚。
9363今年6月底到期，輪價24.2仙，溢價2.4%，槓桿率8倍；9366喺6月初到期，輪價19.6仙，溢價3.2%，槓桿率11.3倍。兩隻輪最大缺點，係交投好少，難買賣。
中企Call輪交投熱鬧嘅有9460，7月到期，輪價3仙，溢價去到20.8%，槓桿率36.9倍。除非國企彈得非常非常勁，否則9460最後都係瓜多過菜。博藍籌守得穩，短炒恒指Call輪，可以揀9799，9月到期，輪價15.7仙，溢價3.1%，槓桿率12.7倍。
章盛