因天水圍三屍命案被傳媒指佢「指馬為鹿」嘅警隊大公關馬維騄總警司真係應驗咗佢上班之日嘅預言──俾人攞佢個名嚟開玩笑。
又真係好難怪人。女死者嘅宿友咬定金淑英遇事當日去過天水圍警署報警，馬警司上星期不但話查過晒啲紀錄冇，只係收到男戶主報案；重寫埋信上埋電台否認，去得真係太盡。
到後嚟啲宿友開記者會，去埋警署落口供，嗰位放完大假嘅當值沙展上返班，先真相大白。
原來係有嚟過報案，只係沙展同死者傾完冇將件事落簿入電腦，結果新界北總指揮官陳德立要開記者會認衰，署理一哥馮兆元同保安局局長李少光都要出嚟話要徹查，不容有隱瞞。
香港人一向都對警隊都好信任，由於事件涉及三條人命，梗係要查到水落石出，睇下有冇人失職，防止再發生慘劇。警方一知真相就自己出嚟承認，香港重有啲希望。
至於馬Sir，佢對自己當日七次否認有其事，因而引起嘅誤解深表遺憾，更希望「經一事、長一智」，以後會醒啲。
馬維騄個名老竇改嘅，騄，駿馬也，本來係好嘢，但係成日俾同學取笑。中國人有句話「最怕改壞名」，睇怕馬老先生從無諗過會有咁嘅問題。
傳真︰2623-9278
電郵︰