羅大佑後日喺台灣舉行一連三場演唱會，本來莫文蔚（Karen）一早答應做晒三場嘅表演嘉賓，後來工作檔期配合唔到，佢即刻通知主辦機構。但因為宣傳海報一早都印上咗Karen個名，主辦機構對佢臨時甩底顯得好苦惱同唔滿意。羅大佑噚日講起件事，竟用粗口問候Karen阿媽。
羅大佑噚日冇出席演唱會宣傳，但就上咗節目《綜藝大哥大》做錄影，對於莫文蔚甩底，台灣記者就問佢要唔要鬧人，佢忽然一句粗口大罵：「×他媽個×！」跟住重話：「因為我很『鬱卒』（台語指心情唔好），不習慣接受媒體採訪。」
主辦機構就爆料話Karen一時答應可以出席，一時又話唔得，重諸多要求，最終應承咗又甩底，話佢誠信好有問題。馮仁昭明白羅大佑俾人「放飛機」嘅心情，但係佢用咁惡毒嘅粗口鬧人又真係太冇修養喇，就算Karen點唔啱都唔應該鬧埋佢屋企人啫！
陳慧琳（Kelly）早前獲邀出席喺揚州舉辦嘅國際經貿旅遊節文藝晚會，由於Kelly首次到揚州，所以工作人員特別安排佢去當地著名嘅瘦西湖遊覽，重坐龍船喺湖上觀光，途中吸引乘坐其他船隻嘅遊客，紛紛向佢揮手㖭。去到揚州都咁受歡迎，睇嚟都可以考慮喺嗰度開演唱會搵銀喎！
鄧兆尊有股份嘅楚留香大酒樓日前正式結業，業權係家族擁有，兆尊噚日喺將軍澳電視廣播城表示暫時未有任何打算，佢話：「自己嘅意願當然係想繼續做，但每個月蝕幾十萬，𠵱家可以做嘅就係賠償畀員工，至於地方會點用都唔係我話事，但有人向我提出想租嚟做超巿或老人院。」
邵逸夫爵士（六叔）每逢周二都會返將軍澳電視廣播城開例會，噚日六叔如常下午返到電視城，不過太太方逸華就罕有咁到大樓樓下迎接佢，只見六叔自行落車，健步如飛行入大樓，有記者重問六叔泰國旅遊好玩嗎？方逸華即刻話：「好玩。」兩夫妻認真恩愛。
羅文生前助手阿東自從去咗名牌JeanPaulGaultier（JPG）做售貨員後，成為唔少狗仔隊嘅追訪目標，前晚JPG喺銅鑼灣利園舖搞show，阿東嘅風頭都唔比嚟睇show嘅名人明星弱，問佢羅文故居放盤一事，佢話：「唔關我事，我老細冇立遺囑，間屋賣得出嘅錢都係歸番同佢有血緣嘅人。」
周華健嘅爸爸周鐘炎噚日喺香港殯儀館出殯，華健帶埋佢嘅外籍太太同對仔女一早到靈堂送別亡父，完成大殮儀式後，靈柩隨即運往深圳大鵬灣華人永遠墳場安葬，華健喺瞻仰父親嘅遺容後不時抹眼淚，不過佢傷心之餘仍然安慰坐喺輪椅上嘅媽媽，真係堅強。
張栢芝同大陸化妝品商「東洋之花」嘅肖像權糾紛，搞咗成兩年終於有結果，本來呢件案已經結束，但喺舊年嘅下半年，栢芝發現對方仍然違約用緊佢嘅肖像，所以再次遞交訴訟，北京市高級人民法院日前亦有終審判決，判「東洋之花」要喺十五日內賠償栢芝五十一萬元人民幣，同埋承擔訴訟費用。
