呢期亞洲球員真係威番次！今屆喺波琴踢得好好嘅伊朗前鋒夏舒文，來屆會過檔拜仁慕尼黑，重可能一腳踢走秘魯國家隊隊長比沙路。
拜仁總經理漢尼斯喺禮拜一大讚同佢哋簽約三年嘅夏舒文，身材好頭槌勁（喺今屆德甲入十四球有六球係靠頭槌），同馬卡爾應可組成一剛一柔嘅前鋒組合；照漢尼斯咁講，原本同馬卡爾拍開嘅比沙路，豈不是變咗多餘？咁又唔係喎，聽講拜仁重想同明夏約滿嘅比沙路續約，不過就要對方願減薪三成左右。
但我求大俠認為，拜仁擺明係要迫比沙路走。話晒比沙路喺德甲都算星級球員，但係嚟緊正選冇咗兼人工又少咗大截，唔走就笨。𠵱家比沙路俾個冇乜名氣嘅亞洲球員迫走，怪就怪佢自己唔爭氣（踢三十七場僅入十球）。
曼城上場主場輸畀修咸頓後，𠵱家喺英超聯排尾四；隊波唔掂，通常係領隊主動叫啲球員練多啲同喺比賽時認真啲；但佢哋就反傳統，竟然係班球員要求領隊基瑾加操，希望操弗狀態。雖則係臨急抱佛腳，但起碼曼城班球員好有誠意，我求大俠亦希望佢哋可以護級成功啦。
佩魯賈諗頭多就係係人都知，繼簽日本球員同埋小卡達菲，以及要脅罷踢意甲搞亂檔，佢哋最近又有新搞作，就係搵啲女仔嚟拍掛牆月曆；雖係喺呢個時間推出新月曆係遲咗啲，但聽聞反應幾好，重令佢哋袋一筆㖭。可惜嘅係，佢哋幾乎肯定要喺季尾降班，令新一屆意甲聯失色咗啲。
些路迪喺禮拜日贏基爾馬諾克後，正式宣布攞咗今屆蘇超聯錦標，咁即係話，嚟緊六場聯賽對佢哋經已冇晒意義。但係，英國廣播電台重會直播些路迪最後一場主場聯賽；而佢哋咁做，係因為係拿臣最後一次喺些路迪公園球場比賽，所以想令廣大球迷同拿臣自己留番個美好回憶。
一個叫卡爾嘅二十九歲米杜士堡球迷，因喺季初米堡主場負阿仙奴○比四場波，俾在場人員捉到佢瞓覺，於是禁止佢再入河畔球場。但卡爾唔服，將事件帶到法庭兼且得直。個法官咁講：「每個英國球迷都有權入場瞓覺，尤其係睇阿仙奴嘅比賽。」咦？法官咁即係寸卡爾唔識波。