《信報》余錦賢都幾幽默，將中央政策組（CentralPolicyUnit，簡稱CPU）稱之為CentralPollingUnit（中央民調組），或CountingPeopleUnit（數人頭組），左丁山睇見，笑咗一餐；劉國師聰明絕頂，博聞強記，閱書無數；講學術，人人話醒，估唔到一入侯門深似海，身不由己，不務正業，要數埋人頭，以便特首可以向中央交代，真係大材小用，如三國時龐統做芝麻綠豆縣令也。
要好似劉國師咁樣博覽群書，並不容易，屋企有冇地方擺書先？富有人家如林行止住喺山頂大屋，有大書房，尚有藏書不易之嘆，我哋呢啲小中產，屋企簡直冇地行走，因為書報雜誌氾濫成災，想擺張枱打麻將都唔易。星期日睇《蘋果日報》介紹大豪宅「雅賓利」低層A室，二千五百四十六平方呎，叫價三千六百萬元，呎價一萬四千一百四十，當然非左丁山之流可以有資格去望一望嘅，睇吓個圖則，只有三間房，書房欠奉，小偏廳只可擺張書枱，聊備一格。左丁山為之嘆息，二千五百呎嘅大豪宅，建築師?地產商畫則嗰陣，居然都唔可以畫到一間書房出嚟，可見佢哋心中，根本唔重視書房，認為香港有錢人唔會讀書藏書嘅，只會收藏名牌時裝啫。大豪宅尚且如此，所謂小豪宅（千幾呎）更加搵笨，一家四口，一子一女嘅話，三間細房已用到盡，雜物與書報，根本無處容身。香港生育率咁低，想落與住宅細小兼昂貴有關，生仔生女要搵房畀佢哋住，啲買屋邊際成本高到驚人，兩人世界會慳番好多錢，年青夫婦唔生育，非常符合經濟道理。