過氣流行天王米高積遜（MichaelJackson），仍然俾九項涉嫌性侵犯男童嘅罪名纏身。案中涉嫌被性侵犯嘅十四歲男童阿維祖（GavinArvizo），早前被傳不久於人世，不過前日有人踢爆阿維祖其實冇病冇痛，𠵱家重住喺豪宅，佢阿媽重唔知點解可以揸靚車㖭。
之前介紹阿維祖畀米高識嘅中間人向美國傳媒爆料，話阿維祖早前患咗癌病同腎衰竭，瘦骨嶙峋，非常之可憐，重話佢屋企太窮，兄弟姊妹床都冇得瞓。不過前日《紐約日報》撕破呢啲假象，話阿維祖現時住喺紐約一間豪宅，重鬼打都冇咁精神。
話說早前有人影到阿維祖參加咗一個兒童軍訓活動，佢經常跳來跳去冇時停，重可以爬過一幅八呎高嘅牆，同一個健康嘅後生仔無異，據講係有人散播阿維祖病重嘅消息，希望博同情。𠵱家有消息話阿維祖肯定可以上庭作供，我羅拉都唔知米高應該開心定唔開心喇。
另外，米高早前入稟法院，要求禁制一個將佢私人珍藏物品以收費方式畀人瀏覽嘅網站，前日終於獲判勝訴。
而米高嘅大佬Jermaine，前日到咗中東國家巴林，除咗可以會見高官之外，重會到當地嘅大學演講㖭。