港股連跌4日後，噚日朝本來都升得好哋哋，點知芬佬繼續大手沽國企，恒指亦受拖累，一度跌逾百點，收報12394，跌55點。港股連跌5日共637點，短期能否扭轉跌勢，惟有寄望格老唔好咁快加息，如果美國提前加息，五隧一橋嘅低息債券真係搵人要。
國企股利淡消息連綿不絕，基金趕出貨鎖住利潤，國企指數一度失守4400水平，收報4447，跌3.8%。國內一時話要提高儲備金比率，一時又話要限制部份過度投資行業嘅貸款，人行重恐嚇話可能加息，而審計署直情落手查化工企業盤數，遏止經濟過熱措施將陸續出台，芬佬唔驚就奇。e莉莎話，重有好多客表示考慮出貨，相信近日國企股跌勢只是剛開始。
花旗銀行突然唱淡中銀香港（2388），話佢動力已轉弱云云，目標價降至12.50元，一句講晒，總之就係叫客沽貨走人。阿虎睇完佢份報告，似乎花旗係擔心中行可能再減持中銀香港股份。中行去年12月中以每股13.70元減持10.7億股中銀香港，並承諾半年內不再沽貨，即係在６月中可以再沽過。現時大市氣氛利淡，投資者見繩當蛇，中銀香港難免受困於中行減持的陰霾。
科龍（921）好似一拖（０３８）翻版，公布完唔算太差嘅業績後，股價即急挫，最多跌過24.7%至3.20元，不過低位買盤頗強勁，令跌幅收窄至18.8%，收報3.45元，全日成交2786萬元，唔似係芬佬洗倉。
阿虎