最近新盤市場又活躍番，噚日有兩個新盤，一齊開示範單位，各有特色。
長沙灣宇晴軒，喺售樓處開放第一個示範單位，揀咗「法國名牌之家」主題做包裝，放幾件歐洲名牌LouisVuitton產品點題，有手袋及絲巾等，一共三件，重有皮製梳化與色調設計，擺明要配番個歐洲feel。
至於已屆現樓嘅尖沙嘴擎天半島，為凸顯摩天大樓氣勢，九龍倉搵嚟室內設計師梁志天幫手，喺第一座現樓設計示範單位。
呢個雄踞八十一樓嘅一四四五方呎三房單位，就地取材，以大都會簡約設計做主題，與物業窗外望到嘅維港繁華都會景致互相呼應。裝修費只係一百萬，唔算奢華，但梁志天話，目的係用最簡單嘅材料，去演繹大都會感覺。
唔少工作地方，空氣質素好差，例如用中央空調嘅大廈，容易散播退伍軍人症。
政府室內空氣質素資訊中心，就為大廈空氣質素做鑑定，良好就發出「室內空氣質素檢定證書」。
置邦管理嘅柴灣新華豐中心，就係其中一幢攞到證書嘅大廈，重係獲證書大廈之中，唯一嘅工貿大廈。喺度返工都會放心啲。
樓市早排交投暢旺，代理做到冇停手。
蘭西聽朋友講，相關嘅律師行業都好好景，佢上到律師樓，見到啲律師個個熊貓眼，神情憔悴，據聞原來係日日要加班。
由於有太多買家要上律師樓辦理手續，搞到大家要好似排隊輪街症咁，個個坐晒喺度等叫名。
個樓市旺成咁，但係，打工仔就好似冇乜受惠。
喜力啤酒廠用數以萬計喜力啤空樽，砌出世界三大名勝，包括車葉可以轉動嘅荷蘭風車、高逾十呎嘅巴黎艾菲爾鐵塔，及長逾三十呎嘅倫敦大橋，率先喺長實北京東方廣場展出，直至本月二十二日，之後會攞去廣州及上海展覽。
喜力又搞競猜比賽，只要估到總共用幾多個啤酒樽，砌成呢三個地標，就可以有機會贏到獎品，頭獎係價值六百蚊人民幣喜力迷你冰箱，其餘十名係一箱二十四罐喜力啤酒，價值百六蚊人民幣。網址
商場大業主不時搞唔同形式活動，吸引消費者，嚟緊焦點梗係五一黃金周啦！對象係內地自由行客。
恒基喺廣州搞宣傳，辦咗個「親子團」嚟將軍澳新都城中心商場。揀呢個場係因為可以切合主題。
呢個「五一親子同樂自由行」團，共有四十人參加，商場提供三重優惠，其一是送出四枚足金金幣，三個十分一盎斯，另一個一両重嘅，就係送畀消費最多嘅團友。
既然係親子團，點可以淨係得阿爸阿媽去買嘢呢，商場會送「美國冒險樂園」代幣畀小朋友，重安排專人，照顧佢哋，等大人買得安心，細路玩得開心。最後發展商會招待團友免費食日式料理。
聽講，恒基與廣州及深圳旅行社合作，希望每月都辦團嚟新都城中心商場。
蘭西
電郵地址：
