路易威登時裝騷繼續。為了照顧現場數以千計賓客的視覺，很多時裝模特兒都在半空出現，例如一對男模特兒便以彈床亮相，彈吓彈吓，愈彈愈高。壓軸出現的是KellyRowland，黑色緊湊的皮膚在台上勁歌熱舞，女士們大叫：「睇吓佢幾Firm?!」陪伴歌舞的還有一座以路易威登產品砌成的皮革巴黎鐵塔，足有幾層樓高，聳立在維港夜景的影像前，跟中銀、國際金融中心、中環廣場等名廈互相輝映，表現了路易威登的野心及決心。
整個路易威登大Party大灑金元，目的是要令賓客嘩然，令賓客尖叫。要有咁多錢使固然難，但識得使更難，要使得有品味，使得其所，路易威登這次無疑做了個一百分。
路易威登是新舊結合，孕育出新生命的典型例子。萬變不離其宗的Pattern，兩個英文字母加上幾個符號，幻化出不同款式的新生命，顧客付出高昂的價錢，路易威登確保閣下得到巧匠的心血，買的已不只是一件物件，而是一份生活品味、態度。
順帶一提，這次路易威登選擇香港作四大慶典城市之一，相信添馬艦這塊寶地居功不小，位處城市心臟、佔地廣闊、容易矚目。鬼唔知元朗、屯門、西貢大把地，但要啲名人扮晒靚專程赴會就確係難。
嘉年華、維港騷、路易威登大Party，添馬艦已帶給港人不少歡樂，不如就由得添馬艦永遠成為寶地一塊吧！要填密整個城市何其容易？精采的是如何留白，不如就留下添馬艦這一點白吧！