國企噚日繼續大洗倉，唔少熱門股跌幅又係七八個巴仙，重有一拖（038）同廣東科龍（921），跌幅成14%同19%，呢場係恐慌性拋售，咁樣跌法，唔排除會一次到底。家下國企嘅跌幅，同高價相比，普遍都有三四十個巴仙，到跌勢喘定之時，市場又會有聲音，話股價已跌到吸引水平，買得過。
其實，今年國企嘅盈利，唔少都仍然有可觀嘅增長，雖然中央要冷卻經濟，極其量亦只會令盈利的增幅略為放緩而已。資源股04年PE有低至4倍，普遍的亦只係6至8倍，可趁每次調整低潮吸納，下半年會有好收成。
大市連跌5日，噚日跌55點，期指轉為略高水，短期策略，仍係以博反彈為主導，國企股跌得最多和最急者，反彈亦會最快；至於藍籌，地產股可優先選取，特別係新地（016），二三線方面，富豪國際（078）傳會有好消息，可留意。
利民實業（229）派成績表，年度業績比預期為佳，宣布後股價跟大圍市回軟，收2.8元，跌5仙。利民股價在2.9元至2.8元的窄幅內整固已個多月，若破位而落，下一個支持將會係2.5元至2.6元，到時可收集作中長線持有。
03年度（12月年結），利民營業額8.05億元，升43.5%，獲利8388萬元，升92.6%，每股盈利25.8仙，末期派息10仙（02年為7仙），連同中期合共14仙，往績PE10.8倍，息率5厘。
利民主要生產小家電和煙紙，期內家電銷售6.3億元，升42.4%，分部業績8808萬元，升59.1%；煙紙銷售1.63億元，升40.7%，分部業績3908萬元，升67.4%，而投資物業租金收入則由前的182萬元大增到1055萬元。
04年，集團已推出抽濕機和新型香薰機兩種新家電，而投資5億元建設的兩條PM3及PM4的多孔卷煙紙和水松原紙生產線，前者已於今年1月投產，後者亦預期在第二季啟用，全面投產後，煙紙產量可增加1倍，每年帶來收入逾2億元。
預計利民04年盈利可達1.05億元，升25%，每股盈利25仙，派息16仙，以12倍PE計，持有1年，目標價係3.4元。
郭兆誠