港股連續第4日下跌，但噚日嘅跌幅已大為收窄，恒指曾落到12324，係今次跌市嘅新低，但低位有承接力，行情在午後反覆回升，結果收12450，僅微跌8點，而期指則升50點，收12430，低水收窄到20點。噚日大市交投已縮到只得117億元，僅國企資源股沽壓較大，看來第一階段的跌市已接近尾聲，反彈好快會出現。
有大行預測國企指數會大跌50%，即係落番2700點水平，以目前中國經濟發展同公司盈利看，呢個應該係「冇可能」發生嘅事。雖然市場憂慮中國使出宏觀調控招數，經濟可能會硬着陸，但筆者有信心，中國不會重蹈93年「一收就死」的覆轍，以目前的趨勢看，GDP增長有可能已見頂，而上月的固定資產投資亦已較首兩個月回落，中國無疑仍會推出新的緊縮政策，但相信力度唔會太大，而預期經濟亦可以軟着陸。
噚日國企資源股大跌，幅度成6至7個巴仙，不外乎係呢類股份過往升得太急，因此調整幅度亦較大，不過，噚日已唔見到有大行繼續大手沽貨，看來佢哋「玩波幅」亦去到尾聲，國企若反彈，呢類股份亦會行先。講番隻重鋼（1053），噚日4.25元都買到，若呢個係低位，則反彈跌幅的0.382，上番4.75元，就賺番轉先，睇定再玩過。
華能國際（902）再進行注資，向母公司收購5間電廠權益，作價45.75億元（人民幣．下同），另需承擔約72億元債務。另外，華能宣布今年首季業績，營業額64.6億元，升25%，獲利14.04億元，升24.58%，主要原因係發電量升24%，同經營效率有改善。
5家電廠分別位於遼寧、河北、江西、湖南及重慶，完成收購後，華能所佔的運行裝機容量增加3096兆瓦，至18832兆瓦，今次係華能首次進入中南部地區，配合公司「鞏固沿海、拓展中部」的發展策略。今次收購，相當於5電廠03年盈利計PE約9倍，對集團頗為有利。04年度（12月年結），華能盈利預測可調升到64.5億元，升18.7%，每股盈利54.7仙（折51.6港仙），上月22日曾作推介，當時股價15.5元（送股後7.75元），中線持有，仍可以10元為目標。
郭兆誠