執亞洲隊帥印唔易做<br>球驗客手記:南韓教頭率先落台

執亞洲隊帥印唔易做
球驗客手記:南韓教頭率先落台

南韓國家隊教練高爾奧噚日終於正式辭職,率先成為自從兩年前世界盃後,首位落台東亞三強教練,作為外籍教練,要執教一支亞洲球隊真係唔易。
南韓世界盃外圍賽俾馬爾代夫迫和,成為高爾奧辭職導火線;呢位葡萄牙教練日前出席記者會時覺得好無奈,話唔識當地語言同文化,外國教練真係好難適應。有傳前塞內加爾教練麥素,或者前土耳其教頭根尼斯會頂上。
其實,軒迪克之前帶領南韓有好成績,球迷要求提高,高爾奧接任一定唔容易。薛高同阿里漢教日本同中國面對同樣問題,命運如何?亞洲盃表現會定兩人生死。

鍾絲有子萬事足寧凑仔唔做女飛人
美國飛人鍾絲自生完BB休養一排復出後,成績麻麻,早前跑咗兩場六十米一贏一輸,噚日喺加州一項賽事跑二百米,結果只得梗頸四;雖然鍾絲話自己久疏戰陣需時恢復狀態,但同時佢又認自從做咗媽咪後心境唔同晒,唔似以前全身投入跑步,睇怕昔日短跑女王一去不返囉!

佩魯賈威脅罷踢狂人會長死剩把口
佩魯賈前日輸畀森多利亞後,狂人會長加奧治怒吼最近遇太多唔公平嘅執法,話考慮罷踢餘下四場聯賽喎。佩魯賈降班機會好大,怕且佢再冇幾多機會發表語不驚人死不休嘅言論。唔知佢係咪睇見重要對祖雲達斯、羅馬,護級機會渺茫,索性盡地一煲再搞啲出位嘢呢?

阿達斯臭馬收火NBA判停賽且饒人
溜馬嘅阿達斯出名火爆,不過今年一直打得唔錯,亦冇咩暴力事件。好似上仗對塞爾特人,佢見到隊友小奧尼爾俾人惡意侵犯之後,躁到差啲郁手打人,但都忍住冇衝出場助拳;不過NBA就話佢離開咗後備席,所以可能要罰停一場;其實佢已經修心養性,不如網開一面喇!

卡邦尼唔順攞牌嘥華倫時間冇得反先
華倫迫和皇蘇,周中踢歐洲賽球隊就只有維拉利爾贏波。華倫連追兩球執一分,但其實老將卡邦尼補時階段,為張黃牌同旁證理論,隊友勸都冇理;結果華倫臨尾博到個罰球,但球證冇等埋就吹完場。我求大俠覺得,如果卡邦尼完場先向球證理論,起碼重有個罰球機會一博嘛。