鄭伊健噚日喺都會海逸酒店舉行「BMGWelcomesEkinHomeAgain」記者會，伊健嘅好友陳小春、林曉峰（阿Lo）同埋十幾個fans都有到場為佢打氣。伊健好風趣咁解釋今次回巢BMG係因為覺得自己之前一個人移咗民去外地，外面好冷清，始終都係覺得BMG溫暖啲，所以佢返嚟。BMG為咗歡迎伊健回家，特別煲咗靚湯畀佢飲，重嚟一個敬湯儀式㖭，都幾溫馨㗎。
唔知佢係咪仍然對上一間唱片公司英皇有不滿，所以一班記者就問佢有冇後悔之前「移民」去英皇，伊健就答話之前嘅日子當係一個經歷。
另外，噚日個記者會係由阿Lo擔任主持，而在場亦都有唔同媒介嘅高層到場，其中一位就係TVB高層何麗全。阿Lo嘅家姐林珊珊重喺台下搞笑咁話：「何生，快啲教吓佢（阿Lo）乜嘢叫尊師重道。」而伊健亦都唔放過呢個機會窒阿Lo，佢重不時喺台上叫對方以後小心啲講嘢。
長腿姐姐萬綺雯最近為廣州一美容中心做代言人重拍埋廣告，不過萬綺雯絕唔會好似有部份藝人為做纖體代言人而搞到暴肥暴瘦。遲啲萬綺雯要去北京拍劇，由於溫差好大，容易傷害皮膚，佢只好帶定護膚品嚟護理皮膚，識得保住搵食架生，認真醒目。
張耀榮日前踢爆梅艷芳母親曾致電向佢借錢周轉，梅啟明噚日去咗中環律師樓搞手續，佢事後喺電話度話：「借少少有乜用？起碼都借二千萬，不過我哋屋企暫時都冇需要，我承認保險金支票係未入票。」而張耀榮就話：「個報道擺咗我上枱，就算梅媽嬲都冇辦法，但佢就冇再打電話畀我囉。」
周華健嘅爸爸周鐘炎日前喺香港旅遊時病逝，華健即刻放低晒手頭工作，幫老父辦理喪事，佢噚日同老婆、兒子同媽咪去咗北角香港殯儀館度為亡父設靈，喪禮用咗佛教儀式進行，有唔少圈中人都送上花牌致祭，李宗盛、五月天同陳自強等噚晚都有去致祭，而周華健爸爸嘅遺體今日會運去深圳安葬。
