山頂豪宅普樂道十號天比高，上月終有新主人，市傳此人為影星周星馳或有關人士，「星爺」對呢件事冇承認，又唔否認。成交登記噚日出咗，土地註冊處資料，購入公司為星揚海外有限公司（StarRoyaleLimited），董事有星爺胞妹周文姬同周星霞。
有熟識周星馳嘅人士話，星爺一向愛用胞妹周文姬、周星霞，作為持有資產公司負責人，好似由佢拍攝嘅《少林足球》，製作及環球發行公司股東兼董事都係佢胞妹。
以演喜劇聞名嘅星爺，一直有買投資物業，年多前買入旺角先達廣場舖，最近賣咗賺千三萬，96年又購入山頂普樂道七號獨立屋。今次最大手筆，以三億二奪得天比高，首次充當發展商。
𠵱家佢持有兩項山頂豪宅物業，做其大業主。
蘭西近日喺將軍澳做完嘢，到慧安園商場酒樓食晏，搭枱搭着酒樓經理，健談嘅佢，好感慨話間酒樓要結業！
聽講上手間酒樓，兩年幾前全線結業，業主以免租免頂手費畀佢老闆經營，扣除開支，有得賺就五五分帳。
雖然位置比較吊腳，但係佢哋好有諗頭，將酒樓電腦化，又將部份地方間成舞池，搞懷舊金曲卡啦OK，吸引唔少區內外熱愛跳社交舞嘅中年人士捧場，個場周不時重畀社團租嚟搞聯歡會，生意唔錯。
無奈當有啲起色時，遇上沙士，加上新都城商場唔少酒樓以平價搶客，兩年來都冇錢賺。近期樓市旺咗，消費力又強番，唔知係咪咁，業主要求六月起收番每月十萬蚊租。老闆話，既然係咁唔做算嘞！
不過，蘭西去睇過，見門口貼嘅告示（圖三）話內部裝修，暫停營業。
樓下啲舖仔就擔心，冇咗間酒樓，人流少咗，會影響生意。茶客就話冇咗聚腳地，最傷心重係班舞林高手。
九龍倉過去周末推出車位發售，代理有生意梗係唔會錯過啦，結果又要大鬥法一餐。
美聯總共促成近一百宗，贏晒其他對手。九龍倉助理董事黃光耀就頒咗個獎畀美記，獎勵一番。
聽講，重即場畀咗個「車神」稱號美記九龍組，因為佢哋做得出色。
至於美記促成嘅成交中，有逾六十宗係又一邨又一居車位。
蘭西早前提過，中山星晨花園今個月十八號抽籤賣樓，重送優惠招徠。聽番，樓盤最後收到四百幾票登記，開賣首日，沽出七十六伙，反應都算幾好。
售樓處現場當日上晝十一點半，已有近七百人聚集，場面都算墟冚，發展商好似香港咁，分批推出單位，等個價做得好啲。
據星晨花園發展商講，即場加推五次。唔知係咪紀錄呢？
薄扶林貝沙灣三期近排賣到如火如荼，唔少投資者入市，舊年用八百幾萬買咗間貝沙灣二期嘅中原董事唐秉正，日前再度出擊，以六百七十萬，增持三期2座低層B，呎價七千三。
佢話睇好後市，諗住買多個單位長線收租，預計租金回報有成五厘。果然身體力行，支持樓市。
貝沙灣三期由第一日開賣到𠵱家，只係個幾禮拜，已經升值。唐秉正估計，佢個單位，𠵱家應該值八千幾蚊呎。唔使一個禮拜，帳面已經賺咗近一成。佢重話，除咗呢兩個單位，嚟緊睇啱，重有機會再買樓投資。
蘭西
電郵地址：
