大市繼續唔多掂，搞到小初愈嚟愈冇心機，真係想乘機放假唞一唞。經紀黃就話，希望在人間，就算大市方向唔明朗，一樣有得炒，好似早排先至公布業績嘅冠捷科技（903），股價屢創新高，認真唔到你唔服。
冠捷在4月初公布全年業績，盈利6958.4萬美元，比起舊年增加35.6%。市場喜出望外，就算港股回落，股價一樣表現硬淨。一直力撐冠捷嘅美資行，噚日出報告唱好，調高冠捷目標價至6.50元，股價升4.55%，收5.75元，又創新高，真係唔到你唔服。
另外，基電控股（681）上周五在股東會上通過業務重組及發行新股等計劃後，股價連續兩日逆市上升。噚日大升14.46%，收0.475元，金額675萬元。經紀陳話，市場傳聞基電深受大陸投資者支持，原因係公司即將轉型至燃氣生意。
其實呢排證券界對一眾燃氣股反應一般，可能同華燊燃氣（8035）被證監會下令停牌有關，所以小初實在唔明基電變身燃氣股，居然可以炒一餐。
慕容小初