應屆香港區羅德學人，又係中大學生取得，呢位得主馮思宇（繙譯系）去到牛津讀PPE之後，由柏拉圖讀到邱吉爾，巴柏（Popper）、黑格爾讀到羅素，李嘉圖讀到海耶克、佛列民，就會明白到佢對民主普選嘅認知，幾咁膚淺，畀啲心機啦。
繙譯系學生應該中英文皆精，以董橋、陶傑為師。金聖華教授寫得一手好文章，講國語，幾乎冠絕中大。馮小妹如果學到金教授文筆幾成，好唔錯嘞。睇吓金教授撰寫嘅「榮譽文學博士余光中教授」贊詞：「縱觀余光中教授的畢生成就，始以『茱萸的孩子』之身生於重九，繼以『火浴的鳳凰』之稱自淬自礪，終以『火中龍吟』之勢蟠蜿嘯傲於華夏文化的萬里長空。多少年來，文壇巨匠以卓犖不凡的天才，淋漓飽酣的健筆，將密密的情思，綿綿心意，縫在千疊百褶的波浪裡，經惠風吹送，盪漾到兩岸三地……」馮小妹有排學，何苦講一啲自己唔識嘅事情。
求學不是求分數，知易行難。馮小姐以前係DGS九優尖子，求分數就冇得彈嘞。求學應該入DGS呢啲名校還是國際學校呢？老友地產K正為女兒明年升中派位憂心，猛咁問人。前幾日佢收到一張「垃圾傳真」，推銷二手會籍買賣租賃，粉嶺高爾夫球會會籍賣五百二十萬，租金三萬，其中竟然亦有：「漢基國際學校」七十五萬（相信係debenture）。地產K睇完唉吔一聲，因為佢嘅大老闆啲仔女全部就讀CIS（漢基），佢恨到流口水，但二手價咁貴，即使為咗個女，都非常肉痛，唔似得人哋讀女拔萃，價廉物美也。