外圍做好些少，但港股仍然不振，早段一度跌至12324，跌134點，但成交稀疏，反映沽壓有限，恒指最終僅跌8點，收報12450，成交僅117.2億元。
噚日晨早就傳出嘉華國際（173）成功勾出沙田及馬鞍山地皮，但地產股冇乜反應。港府收市後公布勾地價，都算偏高，今日地產股可能有睇頭。不過Cookie唔係太樂觀，佢話政府在地價上企硬，國內建材成本高企，而加息步伐可能加快，令融資成本增加，即使樓市持續暢旺，地產商都未必有着數。
曼盛生物科技（512）早前宣布重組股本，20合1。當時市場估計係為發新股作部署，點知原來係供股，重以93%大折讓價供股。噚日股價應聲大插水，低見0.025元，最多跌過56%，收報0.037元，仍跌35%。散戶一向唔鍾意供股，一見供股就掟貨，因此股價通常大跌。今次曼盛1供3，兼以大折讓價供股，小股東如果唔供股，股權就肯定被大幅攤薄，但由於股價已大跌，現時在市場沽出亦冇着數。綜觀今次大股東擔任包銷商供股，並無申請豁免全購，顯示大股東唔介意低價增持股權，可能小股東供股好過唔供。
第一拖拉機（038）去年轉虧為盈，賺1633萬元人民幣，但差過預期。此股在0.50水平起步炒上，大戶趁消息出貨食胡，而市場承接力弱，結果搞到好似洗倉一樣，股價大挫26.4%，收報1.84元，成交高逾1億元。雖然如此，估計大戶獲利仍豐。
阿虎