大市氣氛都重係麻麻，但收市恒指12450，只係微跌8點，同早段最低12324（散133點）比較，已經大有好轉。
昨日指數只係唔見幾點，滙控（005）係最大功臣，收115.50元，爬高1格，拉高恒指17.9點。下一步，大市技術性反彈，滙控可能會繼續造好些少，可細細注博吓滙控Call輪。
滙控Call輪超過60隻，大部份嘅數據都合理，溢價冇點離譜。輪價變化，完全視乎正股點走。想搏殺，揀9157，6月初到期，輪價15仙，溢價3.5%，槓桿率77倍，食得鹹魚抵得渴，賭呢隻，要預咗贏得多同輸得多。風險程度較細而爆炸力唔弱嘅，有9135，6月底到期，輪價69仙，溢價只係1.2%，槓桿率16.7倍。呢隻輪嘅缺點，係交投冇咁活，細注可以諗。想揀長期一啲嘅，則主角係9640，9月至夠鐘，輪價63仙，溢價5%，槓桿率18.3倍。
近期疲弱市道之中，中電（002）都弱埋一份，昨收40.20元，再跌50仙。中電估計40元大關可以守住，Call輪9302揸得過，年底到期，輪價0.36元，溢價0.7%，槓桿率11.2倍。咁長壽又有咁高槓桿率，而溢價則咁低，係因為正股屬高息股。隻輪交投唔多，用嚟揸冇問題，用嚟炒則唔係咁適合。
章盛