呢排係上市公司公布業績高峯期，幾乎日日都有十幾間公司出業績，如果要睇晒嘅話，恐怕要花幾個鐘頭先掂。至於有炒業績概念嘅股份，經紀陳推介冷門半新股中怡精細化工（2341）。
經紀陳話，中怡係來自廈門嘅民企，主要從事手性藥物原料及醫藥中間體、天然藥物原料和芳香化學品。小初聽完之後一嚿雲，經紀陳亦係一知半解，只係話香港冇乜上市公司搞呢門生意。
中怡3月初以每股1.38元招股上市，第一日掛牌見過1.59元後，其餘大部份時間在招股價水平浮浮沉沉，小初覺得隻股唔夠動力，但經紀陳就唔係咁睇，佢話上周大市勁跌，中怡股價亦冇乜變動，反映街貨夠晒乾。
中怡明日公布上市以來首個全年業績，根據傳統智慧，新簇簇嘅公司業績一定唔會差。經紀陳話聽聞盈利有五千零萬銀，高過招股書預期。照經紀陳咁講，如果有炒家想借勢炒作，亦未嘗不可。
中怡上周五收1.45元，升4.32%，成交量較之前略增。
慕容小初