合和灣仔起酒店個大計劃，又再被城規會否決，哥頓胡應湘爵士（圖）當然㷫過火屎，佢話中有骨咁講：呢件事證明佢二十幾年嚟「並無官商勾結」同搞「金權政治」，又話「或者我改個姓，方案就批咗啦！」語帶酸溜溜。佢成百億身家，使唔使講嘢咁刻薄呢？何況佢真正退休前最大的希望，並非呢個酒店項目，而係港珠澳大橋，可惜人哋廣東省唔畀面，唔係太熱心，起得成條橋，個酒店大計咪畀個仔慢慢搞囉，何況佢又要做好間「搵食大學」，大把嘢忙。
講起爵士銜頭，八方聽聞係同機場有關。話說啟德飽和，胡應湘最先提出要起新機場，重有晒計劃，點知被專家顧問打殘。八九年六四之後，衞奕信忽然要搞玫瑰園，於是新機場上馬，但就完全冇胡應湘份。誰知英國佬九七落旗歸國之前，竟然畀番個爵士過佢，盼得雲開見月明，胡爵士，咁躁做乜，笑吓喇。
傳真︰2623-9278
電郵︰