一塊手機假電，不單止炸毀了一部Nokia3310，亦炸醒整個手機「老翻」界。其實假電在市場上流行已久，只是今次爆炸揭露了人們對冒牌假電安全程度的關注。要數手機假貨，絕對唔淨止電池咁簡單，基本上可以由外到內都係假。無良店舖蠱惑招數層出不窮，今次就搵嚟手機界老行尊Louis，教大家分真假之餘更提防陰濕招數！
記者、攝影：劉耀祥
ImageGirl：Cody
LouisProfile
縱橫手機界10年，在港九各區開設多間手機舖。
買機防騙必睇：
1.機殼接駁位是否順暢。
2.電池字體是否清晰，貼紙是否整齊。
3.試機時連續不停㩒掣，睇吓有冇Hang機。
4.說明書印刷是否甚為粗糙。
5.切勿買太舊型號，就算有機都未必係全新。
Nokia手機佔據全球四成手機市場，不過以Nokia為名生產的假貨，更加差不多雄霸整個假貨市場。想知點樣由頭假到落尾，睇睇呢部假機就有唔少破綻。
發生爆炸事件後，大眾及傳媒們都將注意力集中在電池上，認為是假電池短路及發生高溫引致爆炸。講到人心惶惶，但係市場上偏偏又假貨橫行，點知邊啲真邊啲假？「最理想當然係去番特約嘅舖頭買。假電只係原裝電四分一來價，高利潤之下市面一樣會有人賣。想分辨真假電都唔係難事，只要細心一啲就會睇到，最易睇嘅就係假電外表顏色較淡、凹凸感亦唔平均、字體模糊、接駁位造工較粗等。市場上亦都有所謂代用電，呢類電池都係由有牌子嘅生產商生產，所以質素一定比假電好，危險性亦都較低。」手機舖老闆Louis說。
「有啲舖頭會有充電服務，其實充15分鐘電都勉強用到一日，所以最好就睇住佢，以免俾人換塊假電。」
電池市場大，生產假電的確有利可圖，不過部份內地商人更無良到連電路板都自行生產，實行假貨都有「一條龍」！「假（電路）板情況多數出現喺Nokia舊款嘅3系及8系手機，因為最多人搵呢幾款機。不過想知道塊板係咪假，買機嗰陣用肉眼都真係好難分，冇理由買機叫人拆機畀你睇，唯一方法係買時㩒多啲掣、㩒快啲，若果係假板嘅話好易會Hang機！」
「其實除舖頭之外，近期都有『獨行俠』用『真機殼、冇底板』嘅手機喺街兜搭，部機入面只有一塊好簡單嘅特製電路板，通常開機見到個開機畫面之後就熄機，賣方會以冇電為由，乘機甩身。通常啲客拎呢啲機去整，想幫佢整都冇計。預防？冇乜㗎啦，惟有唔好貪平喺街隨便買機。」
除電池及底板之外，市場上其實亦都有唔少假Handsfree，雖然用假Handsfree所引發的問題不及電池及電路板嚴重，不過一個假Handsfree只係幾蚊來價，真貨差唔多貴成10倍，亦自然吸引唔少無良舖頭入貨。加上用真貨嘅價錢買件假嘢，就肯定唔開心，其實分真假Handsfree都好容易，特別留意「Nokia」字樣就可以分辨得出。其次就係收音咪孔，原裝孔內會有海綿，假貨則會見到銀色底色。而且假貨耳筒造工非常粗糙，駁口位虛位特別大，只要細心少少就冇咁易中招。
其實好多手機舖唔單止會賣假機，部份無良舖亦都會將翻新機，以及二手機當新機賣（兩者俗稱鬼機），其實部份太舊型號，生產商亦早已停產，所以就算話有新機賣，好多時都只會係翻新機或者二手機，所以買機嘅話都盡量唔好買太舊款嘅機種。以下介紹嘅型號，廠方已經停產，若果話有全新機賣嘅話就要提高警惕。
