最近返香港重出江湖、計劃同兄弟開拍新片之餘，又搞演唱會嘅歌神許冠傑，聽市場講剛以1470萬，買咗間大埔康樂園東路單號屋，面積成3100呎㗎。原業主原來舊年先以998萬買入，用咗200幾萬裝修，只住咗大約4個月。蘭西諗歌神可能好鍾意間屋嘅裝修設計，同埋見新簇簇無乜磨損，明知屋主賺兩成幾都肯買。
其實歌神一直都好鍾意康樂園居住環境，自從多年前賣咗世界花園舊居後，就一直住喺康樂園間3000呎大屋。今次唔知佢係想換屋定係想買多間呢？
聽美聯物業區域董事陳光明講，原業主都住喺康樂園，自己又有喺區內買屋投資，𠵱家好似重揸住兩三間屋。
樓價急升，唔少業主賣樓都有得賺，遲啲賣個價可能重高，賣早咗嘅又怕蝕水，為求賺多啲，間唔中都有業主賠定再售個案，聽中原分區經理林少禮講，東涌映灣園二期最近就出現幾宗呢類個案。
7座中層F室，原本成交價係180萬，有買家願出197.8萬，咁業主梗係賠定再賣啦，計埋佣金等費用，計落賺多10萬㗎。而8座高層C室，成交價188萬，但跟住有買家肯畀207萬，業主於是賠定8萬，咁又賺多10萬嘞。
另一宗8座高層H室，本來以296.8萬達成協議，後尾業主覺得賣平咗，情願賠定10萬，之後重封盤唔賣㖭。
呢排一手樓市冇咁熱鬧，發展商同代理合辦嘅宣傳活動都少咗好多，啲代理高層就趁機嗱嗱聲放假，出外旅行充電，好似利嘉閣董事總經理何紹章早排去咗南非旅行，執行董事廖偉強亦趁復活節去新西蘭。
廖董放假期間都有留意當地嘅樓市，重話百零萬就可以買到間獨立屋，有埋花園，相當正，睇嚟利記可以諗吓做埋海外物業代理喎。另外，自從日本今個月免簽證後，去日本旅遊嘅港人大增，好似中原集團主席施永青同執行董事張奕威咁，趁活復假都一家大細去咗日本玩。
下個月內地五一黃金周假期，唔少自由行客會嚟香港購物消費，商場零售商對呢班貴客自然招呼周到，重有好多優惠㖭！
港客待遇就冇咁好嘞，蘭西聽朋友講，佢有日去一間大百貨公司買嘢，買成近萬蚊，諗住去畀錢時，突然後面有個人講普通話，個售貨員即刻走咗去招呼佢，搞到佢好鬼冇癮。
𠵱家呢個情況似乎愈嚟愈普遍，唔多健康喎！若果淨係得內地客幫襯，對商場大業主都冇乜好處。咁落去即係叫人每到假期就好出外消費，不宜留港，同政府大力宣傳叫人留港消費唱對台。
發展商一手貨唔多，所以少咗搞活動促銷，好似和黃嘅青衣藍澄灣，只係得番幾十個貨尾，原本喺中環華人行嘅示範單位已關閉。
蘭西聽講，和黃喺藍澄灣現樓搭咗個新示範單位，等啲有興趣嘅買家參觀間隔之餘，可以順便實地睇埋樓盤嘅環境，睇定至決定係咪入市。代理話咁樣做買家入市都容易啲。睇番過去兩日，共售出4個一手單位。
蘭西
電郵地址：
