波鞋Guide：占士大帝AZG雷射版暑假登場

雖然入唔到季後賽，但已經成為球迷寵兒的占士大帝，攻勢依然一浪接一浪，就等我為大家報道下半年的走勢。
首先係占士大帝嘅AirZoomGeneration2實物已出現，比AZG1更oldschool，而且加入大熱的雷射刻印技術；不過最礙眼係有條大魔術貼住鞋身，十足當年佢讀中學時比賽要用膠布遮住啲紋身一樣。

安東尼戰鞋聖誕見
更轟動嘅係，本來一剔牌只係做一對畀占士做聖誕禮物嘅雷射版AZG，突然傳出喺暑假期間作超限量發售，不過時間、地點同發售方式全部都未定；點都好，占士大帝威力無邊，入唔到季後賽都賺你一筆！
講開占士，佢好友安東尼第一代戰鞋將會喺聖誕左右現身，顏色當然係白粉藍，鞋身就用上foamposite質料。身為佐敦牌接班人，佢對鞋唔係叫melo一代，而係叫AirJordan1.5，據報靈感來自佐敦一代，不過個人認為除咗飛翼logo外「冇忽似」，香港會有行貨返。
佐敦系列亦續有搞作，就係如箭在弦的AJ13複刻計劃；年尾會先發售黑?紅，以及全新嘅白/泥色。其實係咪真係咁急要復刻十三代呢？個個月都復刻真係頂唔順；反而我最期待都係四月廿八號對安東尼色AJ2，不過香港好似冇得賣……
至於三間牌，為鄧肯推出嘅個人型號Dcool將於六月發售，個人認為比T-Mac3.5更cool，而MVP大熱加尼特的個人型號仍然係得個等字！
Hleung──波鞋網站www.hk-kicks.com 頭目，最愛佐敦同柏賓，最怕寫字。
Email:[email protected]