近年動作多多嘅英國積架汽車（Jaguar），繼推出新一代XJ車系，以及於早前舉行嘅美國紐約國際車展中展出嘅全新ConceptEight概念車後，最近歐洲方面又傳來消息，指佢哋正有意為旗下嘅X-TypeEstate旅行車版，推出適合不同路面使用嘅「全天候」版本。
記者：鄭達基
該消息指出，今次積架汽車會為旗下嘅X-TypeEstate旅行車，響明年年底前推出「全天候」版本，除以為吸引更多用家而下此決定外，同時亦係想與奧迪Allroad、富豪V70XC及富士LegacyOutback等車款爭一日之長短；另一方面，從預想圖中可以睇到，新車造型與普通版本嘅X-TypeEstate相近，但由於車身離地距被升高，加上於兩邊車門加有金屬腳踏，所以新車造型較成熟。
與此同時，消息又指廠方會為新車配用2.5或3.0公升嘅引擎，作為主要動力配搭，隨後又極有可能加入一台2.0公升引擎，佢哋輸出數值各有不同，絕對能迎合不同用家需要；當然一套經過改良嘅懸掛系統，加上出色既四驅功能，對增強車輛嘅操控表現有莫大幫助。但由於新車仍屬設計階段，故有待廠方公布有關資料後，方能確實新車嘅車廂配搭。